Riċetta: Fusilli bit-tonn taż-żejt, bżar aħdar u żebbuġ

Fussili ton taz-zejt (Ritratt ta' Victoria Cassar)

Il-forma tal-għaġin fusilli tgħin ħafna biex iz-zalza tidħol u tinġabar sew meta tieklu, għalhekk għal ma’ din iz-zalza sajfija huwa eċċellenti.

Ħin: 50 minuta

Isservi: 4 persuni

Ingredjenti:

  • 400 g fusilli
  • Żejt taż-żebbuġa
  • Bżaru aħdar kbir (capiscum), imnaddaf u mqatta’
  • 2 basliet, imqattgħin irqiq
  • 4 sinniet tewm, imqattgħin
  • 75 g tadam imqadded, imqatta’
  • Mgħarfa kunserva
  • 400 g polpa tat-tadam, jew 4-6 tadamiet imqattgħin
  • 125 ml inbid abjad
  • 175 g tonn taż-żejt (3 bottijiet żgħar)
  • Meraq ta’ nofs lumija
  • Qoxra sħiħa ta’ nofs lumija
  • 75 g żebbuġ aħdar jew iswed, mingħajr għadma u mqatta’
  • Mgħarfa ħabaq frisk imqatta’
  • Mgħarfa nagħniegħ frisk, imqatta’
  • Melħ u bżar mitħun frisk

 

Tħejjija:

  1. Saħħan 2 mgħaref żejt f’taġen jew kazzola u qalli l-basla sakemm tibda tirtab, imbagħad żid it-tewm u l-bżaru aħdar u kompli qalli għal 3 minuti oħra. Żid il-kunserva u t-tadam imqadded, ħawwad u żid l-inbid ukoll, u tektek sakemm jinxtorob ħafna minnu. Żid il-polpa tat-tadam jew tadam frisk imqatta’, il-qoxra sħiħa tal-lumi, melħ u bżar, għatti t-taġen jew kazzola parzjalment u tektek għal 20-25 minuta, jew sakemm tara li z-zalza bdiet tinġibed.
  2. Sadanittant għalli l-fusilli f’borma kbira ilma bil-melħ sakemm isir al dente.
  3. Maz-zalza żid it-tonn taż-żejt, iż-żebbuġ, il-meraq tal-lumi, in-nagħniegħ u l-ħabaq, ħawwad u kompli tektek għal 3-5 minuti oħra.
  4. Saffi l-għaġin, ħalltu maz-zalza u neħħi l-qoxra tal-lumi. Żid 2 imgħaref żejt taż-żebbuġa, ħawwad u servi.

Ippruvajtha din ir-riċetta tal-fusilli bit-tonn taż-żejt, bżar aħdar u żebbuġ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jogħġbuk.

Would you like to read this recipe in English? Let us know in the comments section below!