Din ir-riċetta tista’ sserviha bħala ikla ħafifa jew tqatta’ kull porzjon f’biċċiet iżgħar biex isservihom waqt xi festin. Minflok ġobon artab sempliċi tista’ tuża wieħed b’xi togħma miżjuda jew ġobon ieħor bħal camembert.
Ħin: 20 minuta
Isservi: 4 persuni
Ingredjenti:
- 8 bajdiet
- 60ml ħalib
- Melħ u bżar mitħun frisk
- Żejt biex tidlek
- 150 g listi tas-salamun affumikat
- 100 g ġobon artab
- 100 g insalata mħallta
Tħejjija:
- Fi skutella ħabbat sew il-bajd mal-ħalib u żid ftit melħ u bżar.
- Idlek taġen non-stick bi ftit żejt u saħħnu fuq nar moderat. Ferra’ madwar 125 ml (¼ mill-kwantità). Dawwar it-taġen sakemm it-taħlita tinfirex. Kif tibda tagħqad għolli ftit il-froġa mill-ġnub biex il-bajd mhux misjur jidħol taħt u jagħqad ukoll. Ħalli l-froġa ssir għal xi żewġ minuti sakemm tagħqad mill-wiċċ ukoll.
- Neħħi t-taġen minn fuq in-nar u fuq nofs wieħed tal-froġa ifrex ¼ mill-ġobon. Fuq il-ġobon poġġi ¼ mis-salamun, u itwi n-nofs il-vojt tal-froġa fuq dak mimli. Poġġi l-froġa mimlija fuq platt u għatti biex iżżommha sħuna.
- Imsaħ it-taġen u rrepeti sakemm ikollok l-erba’ frajjeġ lesti.
- Servi fil-pront ma’ insalata mħallta.
