Riċetta: Flett tal-majjal mimli bil-mozzarella, spinaċi u bżar ħelu

Stuffed pork fillets

Għal min iħobb il-laħam tal-majjal imma jrid inaqqas ix-xaħam il-flett huwa l-aħjar parti. Il-flett tal-majjal huwa versatili ħafna biex issajru, u mimli b’ingredjenti differenti  joħloq effett sabiħ xħin tqattgħu roti. F’din ir-riċetta se nużaw il-mozzarella , bżar ħelu aħmar u weraq tal-ispinaċi, li flimkien joħolqu kuntrast ta’ kuluri.

Ħin: siegħa u 15-il minuta

Isservi: 4-6 persuni

Ingredjenti:

  • 1 kg flett tal-majjal (ikollok xi tlieta sħaħ)
  • 200 g mozzarella, imqattgħa strixxi (jekk issib uża scamorza)
  • Ponn weraq tal-ispinaċi mingħajr zkuk
  • 1 bżaru kbir aħmar mill-ħelu, imnaddaf u mqatta’
  • 2 sinniet tewm
  • Kuċċarina origanu mnixxef
  • Żejt taż-żebbuġa
  • Melħ u bżar mitħun frisk

 

Tħejjija:

  1. Aqsam għat-tul mingħajr ma taqsmu fi tnejn il-flett (butterfly). Poġġih bejn żewġ biċċiet cling film u sawtu bil-lembuba jew mazza biex tiċċattjah għal 1.5 ċm ħxuna. Agħmel l-istess bil-biċċiet l-oħra tal-flett.
  2. Saħħan il-forn għal temperatura ta’ 180°C. idlek biċtejn jew tlieta (skont kemm għandek biċċiet tal-flett)  kbar foil biż-żejt.
  3. Poġġi kull l-flett ċatt fuq biċċa foil u idilku biż-żejt taż-żebbuġa. Roxxhom bl-oriġanu, melħ u bżar mitħun frisk. Ifrex il-weraq tal-ispinaċi, imbagħad il-bżar aħmar ħelu u fl-aħħar il-mozarella. Gerbibhom mill-parti t-twila, geżwirhom sew fil-foil u ssikka sew. Erġa’ gerbeb kull qartas f’biċċa foil oħra. Poġġi l-qratas tal-flett ġo dixx u daħħalhom fil-forn għal madwar 30-35 minuta jew sakemm isiru sew minn ġewwa. Ħalli l-flett joqgħod għal 10 minuti mgeżwer.
  4. Qatta’ l-flett roti u servih fuq sodda tal-patata maxx.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.