Read this in English: How to prepare artichokes for different recipes

Il-qaqoċċ huwa pjanta nattiva Meditteranja komuni u mkabbra l-aktar fl-Italja, Spanja u n-naħa ta’ fuq tal-Afrika. Bħal dan iż-żmien anke f’Malta naraw għelieqi miżgħudin b’din il-pjanta li hija min-nisel tax-xewk (Cynara scolymus). Il-parti li tittiekel fil-fatt hija l-blanzun li minnu toħroġ il-fjura, u l-qalba tal-qaqoċċa hija l-fjura li għadha trid tiffjorixxi. Apparti li l-qaqoċċ huwa komuni immens u versatili fir-riċetti, jintuża wkoll biex minnu jagħmlu t-te, kif ukoll liqueur. Huwa wkoll ħaxixa mediċinali peress li huwa wieħed mill-aktar ħxejjex li fih kontenut ta’ antiossidant għoli. Jgħin ukoll fis-sistema diġestiva u fil-funzjoni tal-fwied, u jnaqqas il-livell ta’ kolesterol fid-demm.

Qabel nibda ngħaddilkom xi riċetti tal-qaqoċċ tajjeb li l-ewwel nett naraw kif innaddfuh u nippreparawh bil-lest għar-riċetta tagħna; dejjem jekk mhux se nużawh sħiħ kif inhu. L-ewwel m’għandek tagħmel huwa li tipprepara bieqja bl-ilma miżjud b’meraq ta’ lumija jew ħall. Dan jipprevieni t-truf tal-qaqoċċ li tkun qtajt milli jiswiedu. Tajjeb ukoll li qabel titfa’ l-qaqoċċ fl-ilma tidlek it-truf maqtugħin bil-meraq tal-lumi wkoll – tista’ tuża n-nofs tal-lumija li tkun għasart fl-ilma.

• Jekk se tnaddaf il-qaqoċċ biex timlieh u allura tridu sħiħ:
  1) Aqta’ barra z-zokk daqs 1ċm ’l isfel minn tarf il-qaqoċċa.
  2) Aqla’ l-weraq l-aktar iebes tat-tarf,
  3) B’sikkina aqta’ barra 2 ċm mill-quċċata tal-qaqoċċa.
  4) B’imqass aqta’ barra t-truf bil-ponta tal-kumplament tal-weraq.
• Jekk għandek bżonn il-qlub tal-qaqoċċ:
  1) Aqla’ l-weraq aħdar skur kollu sakemm tasal għall-aħdar ċar.
  2) Aqta’ barra z-zokk u ħalli biss 2 ċm minnu mal-qaqoċċa.
  3) Aqta’ barra l-ewwel terz mill-quċċata tal-qaqoċċa.
  4) B’sikkina żgħira qaxxar il-fdalijiet tal-weraq minn mad-dawra ta’ isfel tal-qaqoċċa.
  5) Aqsam il-qaqoċċa min-nofs għat-tul u b’mgħarfa jew melon baller aqla’ u armi l-parti r-raffa ta’ ġewwa.
• Jekk għandek bżonn il-qigħan tal-qaqoċċ:
  1) Aqla’ l-weraq aħdar skur kollu sakemm tasal għall-aħdar ċar.
  2) Aqta’ barra l-weraq mill-qiegħ.
  3) B’sikkina żgħira aqta’ barra z-zokk kompletament biex ikollok qiegħ ċatt, u neħħi l-fdalijiet tal-weraq minn mad-dawra.
  4) B’mgħarfa jew melon baller aqla’ u armi l-parti r-raffa ta’ ġewwa tal-qaqoċċa.

  Kull darba li tlesti qaqoċċa idlika bil-lumi u poġġiha fil-bieqja bl-ilma sakemm tużaha.

X'taħseb dwar dan l-artiklu? Għidilna billi tħalli kumment jew ir-rating hawn taħtu agħfas share.