Ir-risotto huwa wieħed mill-aktar platti popolari fl-Italja. Huwa ikel tradizzjonali fir-reġjuni tan-naħa ta’ fuq tal-peniżola u kien hekk sa mill-Medjevu. Għal kull riċetta li tagħżel biex tagħmel – jekk hux biż-żafran, b’xi ġobon, jew bil-famuż tartufo – għandek dejjem timxi mal-proċeduri ta’ kif għandu jsir pass pass ir-risotto biex ikollok riżultat mill-aqwa.

L-inkaljatura. Ir-ross għandu dejjem ikun inkaljat f’taġen kbir fuq nar għoli għal żewġ minuti u mqalleb b’mgħarfa tal-injam. Dan il-proċess jagħlaq il-pori tar-ross u jżomm ir-ross milli jsir iżżejjed. Ħafna drabi r-ross jiġi miżjud mill-bidu mat-toqlija, imma l-aħjar mod huwa dak li semmejt aktar ’il fuq, jiġifieri tinkaljah qabel ma żżidu ma’ ingredjenti oħrajn.

Il-brodu. Meta tagħmel risotto huwa importanti li żżidu bil-brodu adattat. L-aħjar brodu huwa dak tradizzjonali, jiġifieri magħmul id-dar, imma xorta waħda jista’ jkollok riżultat tajjeb bi brodu li ssib lest. Għandek tuża l-brodu adattat għar-risotto li se tagħmel. Jekk se tagħmel risotto Milanese jew bil-Parmiġġan, uża miegħu l-brodu tal-laħam; jekk risotto tal-ħaxix, il-brodu għal miegħu għandu jkun tal-ħaxix ( il-brodu tal-ħaxix tista’ żżidu ma’ kwalunkwe risotto); u jekk ir-risotto tagħmlu bil-ħut jew frott tal-baħar għandek iżżidu brodu tal-ħut. Dejjem hu ħsieb li l-brodu jkun jaħraq u li żżidu ftit ftit mar-ross sakemm dan isir.

Biex tgħaqqad. Neħħi r-ross minn fuq in-nar u żid miegħu ftit butir u żejt taż-żebbuġa. Tista’ żżid ukoll ġobon Parmiġġan ma’ ħafna mir-risotti, għalkemm mhux ma’ kollha. Ħawwad kollox flimkien bil-mod, għatti u ħalli r-risotto joqgħod għal ftit minuti qabel isservih. B’din il-proċedura r-ross jiġi kremuż u jleqq.