Riċetta: Vitella fil-panura biz-zalza tat-tadam

Veal escalope

Il-mod li bih hu msajjar dan il-laħam fil-Ġermanja  jissejjaħ ‘schnitzel’ u fi Franza ‘escalope’; hawn Malta normalment insejħulu ‘vitella fil-panura’. Huwa platt popolari f’ħafna pajjiżi u jsir ukoll bit-tiġieġ, ċanga, majjal, eċċ.

Ħin: siegħa

Isservi: 4 persuni

Ingredjenti:

  • 4/8 biċċiet vitella (800 g b’kollox)
  • 100 g dqiq
  • 2 bajdiet
  • Mgħarfa ilma
  • 250 g frak tal-ħobż
  • 2 mgħaref żejt taż-żebbuġa
  • Basla, imqattgħa rqiq
  • 4 sinniet tewm, imqattgħin
  • 400 g polpa tat-tadam
  • Kuċċarina zokkor
  • Kuċċarina origanu mnixxef
  • Melħ u bżar mitħun frisk
  • Żejt veġetali biex taqli
  • 100 g ġobon Parmiġġan, maħkuk
  • 2 mgħaref tursin frisk, imqatta’

Tħejjija:

  1. Saħħan iż-żejt taż-żebbuġa f’kazzola fuq nar moderat u qalli l-basla sakemm issir trasparenti. Żid it-tewm, it-tadam, iż-żokkor u l-origanu, baxxi n-nar u tektek għal 15-il minuta jew sakemm iz-zalza tibda tinġibed. Roxx bil-melħ u l-bżar u ħawwad.
  2. Sadanittant, poġġi d-dqiq fuq platt u żidu ftit melħ u bżar. Ħabbat il-bajd mal-ilma fi skutella baxxa. Fi platt ieħor ferrex il-frak tal-ħobż.
  3. Poġġi l-biċċiet tal-vitella ċatti bejn żewġ biċċiet cling film u sawwathom b’lembuba jew mazza biex jinfetħu. Dawwar il-biċċiet tal-vitella waħda waħda fid-dqiq u farfar iż-żejjed. Bill kull biċċa fil-bajd, imbagħad dawwarhom fil-frak tal-ħobż. Agħfas ftit b’idejk fuqhom biex il-kisi jeħel sew mal-laħam.
  4. Saħħan iż-żejt veġetali f’taġen kbir u aqli l-biċċiet ftit ftit miż-żewġ naħat sakemm jiħmaru sew, imbagħad poġġihom fuq platt miksi bil-karti tal-kċina biex joqtru.
  5. Saħħan il-grill. Poġġi l-vitella fuq tilar, iksi l-wiċċ biz-zalza tat-tadam  u roxxhom bil-ġobon Parmiġġan. Daħħalhom taħt il-grill sakemm jiħmar ħafif il-ġobon.
  6.  Servi l-vitella bit-tursin imferrex fil-wiċċ.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.