Din hija riċetta faċli li tippreparaha fi ftit minuti biss u jkollok platt komplut u kkulurit bil-kontorn b’kollox. It-taħlita taċ-ċiċri fiha togħmiet li jintegraw flimkien filwaqt li jikkumplimentaw it-tjubija tal-vitella li hija msajra b’mod l-aktar sempliċi.

Preparazzjoni: 15-il minuta

Ħin totali:  30 minuta

Isservi: 4 persuni

Ingredjenti:

• 2 bottijiet ta’ 400 g il-wieħed ċiċri, imsaffijin u mlaħalħin
• 150 g tadam ċirasa, maqsumin f’erba’
• Basla ħadra friska, imqattgħa rqiq
• Sinna tewm , misħuqa
• 2 imgħaref meraq tal-lumi
• Kuċċarina żejt taż-żebbuġa
• 4 biċċiet (125 g kull biċċa) vitella
• 2 imgħaref tursin frisk, imqatta’
• 2 kuċċarini qxur tal-lumi, maħkuk irqiq

Tħejjija:

1. Fi skutella żgħira ħallat flimkien it-tursin u l-qxur tal-lumi maħkuk.
2. Poġġi ċ-ċiċri fi skutella oħra u żid magħhom it-tadam, il-basla, it-tewma u l-meraq tal-lumi. Ħallat kollox sew flimkien.
3. Saħħan iż-żejt taż-żebbuġa f’taġen fuq nar moderat għal għoli u żid il-vitella. Sajjar għal 5-6 minuti fuq kull naħa, jew sakemm tieħu l-kulur u ssir għall-gosti tiegħek.
4. Poġġi l-vitella fuq il-platti li se sservi fihom u roxx bit-taħlita ta’ tursin u lumi. Servi mat-taħlita taċ-ċiċri.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!