Riċetta veġetarjana: Ħaxix sajfi bil-ġobon imdewweb fil-wiċċ

Cheesy vegetables

Ikla ħafifa u appetituża bil-ħxejjex tal-istaġun. Din ir-riċetta tagħmel platt komplut imma tista’ tiġi servuta wkoll bħala kontorn għal ma’ laħam jew tiġieġ mixwijin.

Ħin: 45 minuta

Isservi: 4-6 persuni

Ingredjenti:

  • 2 mgħaref żejt taż-żebbuġa
  • Mgħarfa ħall balsamiku
  • Basla kbira, imqattgħa
  • 4 sinniet tewm, imqattgħin
  • Brunġiela, imqattgħa dadi
  • 2 qarabagħliet twal, imqattgħin dadi
  • Bżaru ħelu (capiscum) oranġjo, imqatta’ dadi
  • Bżaru ħelu (capiscum) isfar, imqatta’ dadi
  • 4-6 tadamiet, imnaddfin u mqattgħin dadi
  • Kuċċarina origanu mnixxef
  • Mgħarfa ħabaq frisk, imqatta’
  • Niskata melħ oħxon
  • Bżar mitħun frisk
  • 100 g mozzarella, maħkuka
  • 100 g ġobon cheddar jew tal-qoxra ħamra, maħkuk

 

Tħejjija:

  1. F’taġen kbir saħħan iż-żejt taż-żebbuġa u qalli l-basla sakemm tibda tirtab, imbagħad żid it-tewm u l-brunġiel u kompli qalli sakemm dan ukoll jibda jirtab. Żid il-qarabagħli u l-bżar ikkulurit u kompli qalli, imbagħad żid it-tadam, il-ħall balsamiku, l-origanu u l-ħabaq, il-melħ u l-bżar. Għatti parzjalment it-taġen u tektek għal madwar 20-25 minuta.
  2. Ferrex il-mozzarella u l-ġobon cheddar jew tal-qoxra ħamra fil-wiċċ, għatti t-taġen u ħallihom fuq nar baxx għal madwar 2 minuti jew sakemm il-ġobon kollu jinħall fuq il-ħaxix.
  3. Servi ma’ ħobż frisk jew pitta msaħħna.

Ippruvajtha din ir-riċetta ta' ħaxix sajfi bil-ġobon imdewweb fil-wiċċ ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jogħġbuk.

Would you like to read this recipe in English? Let us know in the comments section below!