Insalata friska ta’ malajr magħmula minn ingredjenti sempliċi imma li jikkumplimentaw lil xulxin. Biex timla’ tista’ sserviha ma’ ħobż bil-qoxra.

Ħin: 20 minuta

Isservi: 4 persuni

Ingredjenti:

• 300 g mozzarella friska, blalen żgħar jew mozzarella mqattgħa dadi
• 2 ħjariet żgħar
• 300 g tadam ċirasa
• Avokado
• Mgħarfa meraq tal-lumi
• Mgħarfa basal imqatta’ rqiq ħafna (jekk trid)
• 2 mgħaref ħabaq frisk, imqatta’
• 2 mgħaref żejt taż-żebbuġa
• 2 mgħaref ħall balsamiku
• Nofs basla żgħira
• Melħ u bżar mitħun frisk

Tħejjija:

1. Qaxxar l-avokado, neħħilha l-għadma u qattagħha dadi. Poġġiha fl-iskutella li se sservi fiha, roxx fuqha l-imgħarfa meraq tal-lumi u ħawwad sakemm tinkesa l-avokado.
2. Neħħi t-truf tal-ħjar u qattgħu dadi bil-qoxra b’kollox, u poġġihom fl-iskutella. Aqsam it-tadam fi tnejn jew f’erba’u żidu mal-ħjar u l-avokado. Żid ukoll il-mozzarella u l-basal, jekk se tuża, u ħawwad kollox.
3. Fi skutella żgħira ħallat iż-żejt taż-żebbuġa, il-ħall balsamiku, il-ħabaq u melħ u bżar mitħun frisk. Roxx fuq l-insalata, ħallat u servi ma’ ħobż frisk bil-qoxra.

Ippruvajtha din ir-riċetta ta'  insalata friska bil-ħjar? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jogħġbuk.

Would you like to read this recipe in English? Let us know in the comments section below!