Read this in English: Recipe: Lemon tart

Għal wara l-ikel, id-deżerti bit-togħma friska tal-lumi huma adattati ferm għax jibdlulek it-togħma, speċjalment jekk tkun kilt ikel b’togħmiet qawwija jew jaħarqu.

Ħin: sagħtejn u 15-il minuta

Isservi: 8-10 persuni

Ingredjenti:

Għall-għaġina:

• 150 g dqiq
• 40 g zokkor tal-ġelu (icing sugar), mgħarbul
• 75 g butir
• Isfar ta’ bajda, imħabbat ma’ mgħarfa ilma

Għall-mili:

• 3 bajdiet
• 2 abjad tal-bajd
• 140 g zokkor tal-ġelu, mgħarbul
• Qoxra maħkuka fin ta’ 2 lumijiet
• Meraq ta’ 3 lumijiet
• 250 ml krema doppja
• Zokkor tal-ġelu għall-wiċċ

Tħejjija:

1. Għarbel id-dqiq fi skutella u żid il-butir. Għorok il-butir fid-dqiq bil-ponot ta’ subgħajk sakemm isir qisu frak tal-ħobż.
2. Żid iz-zokkor tal-ġelu u ħawwad; imbagħad żid l-isfar tal-bajda u għaqqad it-taħlita; tellagħha fuq il-mejda u għaġinha ħafif sakemm tillixxa. Geżwer l-għaġina f’borża u daħħalha fil-friġġ għal mill-inqas nofs siegħa.
3. Idlek landa tonda u baxxa ta’ 23 ċm bi ftit butir. Iftaħ l-għaġina u biha iksi l-landa ppreparata. Taqqab ftit il-qiegħ tal-għaġina u aqta’ żżejjed ftit ’il fuq minn xifer il-landa. Iksi l-għaġina bil-karta forn u mlieha bil-fażola niexfa. Daħħalha fil-friġġ għal 10 minuti.
4. Saħħan il-forn għal temperatura ta’ 200°C.
5. Sadanittant ipprepara l-mili:
   1. B’ħabbata tal-bajd ħabbat il-bajd sħiħ u l-abjad tal-bajd fi skutella.
   2. Żid iz-zokkor u kompli ħabbat sakemm ikollok taħlita lixxa.
   3. Żid il-krema, il-meraq u l-qoxra tal-lumi u ħallat kollox sew.
6. Aħmi l-għaġina għal 15-il minuta; imbagħad oħroġha mill-forn, neħħi l-fażola u l-kartaforn u erġa’ daħħalha tinħema għal 5 minuti oħra.
7. Baxxi t-temperatura tal-forn għal 140°C.
8. Ferra’ t-taħlita tal-lumi fuq l-għaġina u aħmi għal madwar siegħa jew sakemm tara li l-mili jkun għaqad. Ħalliha fil-landa sakemm tibred sew.
9. Għarbel ftit zokkor tal-ġelu fil-wiċċ u servi t-torta ma’ frott frisk aħmar bħal frawli jew berries.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.