Din ir-riċetta Ażjatika tat-tiġieġ tippreparaha f’10 minuti u jkollok ikla kompluta fi ftit ħin biss, b’taħlita ta’ tiġieġ u ħaxix imħawrin li tista’ sservi fuq sodda tar-ross jew noodles.

Ħin: 8 minuti

Isservi: 3-4 persuni

Ingredjenti:

Għaz-zalza:

• Mgħarfa soy sauce
• Kuċċarina sherry
• Kuċċarina ħall tal-inbid abjad (white vinegar)
• Ftit qtar Tabasco
• ½ kuċċarina zokkor
• ½ kuċċarina dqiq tal-qamħirrun (corn flour)

Għat-tiġieġ:

• 2 isdra kbar tat-tiġieġ, madwar 500 g, mingħajr għadam u ġilda u mqattgħin f’biċċiet ta’ gidma
• Basla kbira, maqsuma min-nofs għat-tul u mqattgħa flieli għat-tul ukoll
• Bżaru aħmar ħelu (sweet capsicum), imnaddaf u mqatta’ biċċiet ta’ 2 ċm
• Bżaru aħdar ħelu (capsicum), imnaddaf u mqatta’ biċċiet ta’ 2 ċm
• 75 g cashews
• Biċċa ġinġer friska ta’ madwar 3 ċm, imqaxxra u mqattgħa rqiq; jew ½ kuċċarina ġinġer mitħun
• 3 imgħaref żejt veġetali
• Kuċċarina dqiq tal-qamħirrun (corn flour)
• Mgħarfa soy sauce
• Ross mgħolli jew noodles, biex isservi

Tħejjija:

1. Fi skutella żgħira ħabbat flimkien l-ingredjenti kollha taz-zalza, u warrabhom għal iktar tard.
2. Fi skutella kbira oħra ħallat is-soy sauce u d-dqiq tal-qamħirrun għat-tiġieġa. Poġġi l-biċċiet tat-tiġieġ fit-taħlita u ħawwadhom sakemm jinksew.
3. Saħħan mgħarfa miz-zejt f’taġen kbir b’qiegħ oħxon jew wok fuq nar moderat għal għoli. Meta jisħon sewwa żid il-cashews u qallihom għal minuta sakemm jibdew jiħmaru. Tellagħhom mit-taġen b’mgħarfa mtaqqba u poġġihom fuq platt miksi bil-karti tal-kċina biex joqtru.
4. Fl-istess taġen itfa’ l-biċċiet tat-tiġieġ u ħawwadhom sakem isiru, madwar 5 minuti. Tellagħhom mit-taġen b’magħrfa mtaqqba u poġġihom fi skutella għal iktar tard.
5. Saħħan il-kumplament taż-żejt fl-istess taġen u żid il-bżar, il-basla u l-ġinġer. Qalli sakemm il-bżar jibda jirtab imma jkun għadu wieqaf, madwar 4-5 minuti. Erġa’ poġġi t-tiġieġ fit-taġen u ħawwad kollox flimkien.
6. Ħawwad ftit iz-zalza fl-iskutella u ferragħha fit-taġen fuq il-ħaxix u t-tiġieġ. Ħawwad sakemm iz-zalza tibda tagħli u tagħqad, madwar minuta. Żid il-cashews u ħallat kollox sew.
7. Servi sħun fuq sodda ta’ ross mgħolli jew noodles.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!