Riċetta: Spagetti bil-gandoffli (clams)

spaghetti with clams

Nhar ta’ Ħadd inħobb insajjar il-ħut, kemm għax nippreparah malajr u kemm għax nitħajjar u nixtri meta nżur is-suq ta’ Marsaxlokk il-Ħadd filgħodu. L-eħfef ikla bil-ħut li tista’ tagħmel hija frott tal-baħar mal-għaġin; jekk tibdel il-ħut li tixtri u l-forma tal-għaġin u tesperimenta ftit bl-ingredjenti u l-ħwawar ikollok platt differenti kull darba.

Ħin: 30 minuta

Iservi: 4 persuni

Ingredjenti:

  • 1½ kg gandoffli, imnaddfin u mlaħalħin kemm-il darba
  • 450 g spagetti
  • 250 ml żejt taż-żebbuġa
  • 6 sinniet tewm, misħuqin
  • Bżaru filfel, imqatta’ rqiq
  • 100 ml inbid abjad
  • 4 mgħaref tursin frisk, imqatta’
  • ½ kuċċarina melħ oħxon

 

Tħejjija:

  1. Għalli l-ispagetti f’borma kbira ilma bil-melħ sakemm isir al dente.
  2. Sadanittant, saħħan nofs iż-żejt taż-żebbuġa f’taġen kbir fuq nar moderat u żid il-gandoffl, it-tewm u l-filfel. Għatti t-taġen sakemm tara li l-gandoffli qabdu jinfetħu, imbagħad żid il-kumplament taż-żejt, l-inbid, il-melħ u t-tursin u ħawwad kollox. Erġa’ għatti t-taġen u ħalli kollox jibda jagħli, imbagħad kompli sajjar sakemm il-gandoffli jinfetħu kollha.
  3. Saffi l-għaġin u aqilbu fit-taġen mal-gandoffli. Ħawwad kollox sew biex l-ispagetti jinkesa bit-taħlita, u servi fil-pront

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!