Żmien is-sopop għadu magħna u għalhekk tajjeb li naħtfu l-okkażjoni tal-ħaxix frisk tal-istaġun biex nagħmlu dawn il-platti sħan u nutrittivi. Għal din is-soppa tal-qaqoċċ tista’ tuża l-qlub tal-qaqoċċ biss, imma jien nirrakkomanda li l-qlub tużahom f’riċetta oħra u l-fdaljiet tal-qaqoċċ tużahom f’din is-soppa.
Nota: Jekk se tuża l-qlub tal-qaqoċċ, qattagħhom u qallihom mal-kurrat u l-basla; jekk le, segwi r-riċetta kif inhi.
Ħin: siegħa u 20 minuta
Isservi: 4 persuni
Ingredjenti:
- Iz-zkuk u l-weraq ta’ 6-8 qaqoċċiet, li tkun warrabt biex tuża l-qlub; jew il-qlub ta’ 4 qaqoċċiet kbar (Kif tipprepara l-qaqoċċ għal riċetti differenti)
- 50 g butir
- Kurrata, il-parti l-bajda u ħadra ċara biss, imnaddfa u mqattgħa
- 4 sinniet tewm, imqattgħin
- Basla, imqattgħa
- 2 patatiet kbar, imqaxxrin u mqattgħin dadi żgħar
- 750 ml ilma
- 750 ml stokk tat-tiġieġ (jew stokk tal-ħaxix)
- Mgħarfa weraq tas-sagħtar frisk
- 2 mgħaref tursin frisk, imqatta’
- Melħ u bżar mitħun frisk
- 100 ml single cream
Tħejjija:
- Qaxxar iż-żkuk tal-qaqoċċ u poġġihom f’kazzola flimkien mal-weraq.
- Għatti kollox bis-750 ml ilma u poġġi l-kazzola fuq nar għoli. Kif tiftaħ tagħli, baxxi n-nar u tektek għal 40 minuta.
- Saffi l-weraq u ż-żkuk mill-ilma u żomm l-ilma għal aktar tard. Bix-xifer ta’ sikkina qaxxar il-parti r-ratba tal-weraq, żidu maz-zkuk, u armi l-parti l-iebsa.
- Sadanittant, dewweb nofs il-butir f’kazzola kbira u qalli l-kurrat, il-basla u t-tewm sakemm jirtabu.
- Żid il-patata u qalli għal 3 minuti oħra, imbagħad ferra’ l-istokk u l-ilma li tkun għallejt il-qaqoċċ fih.
- Żid ukoll is-sagħtar u t-tursin u għolli n-nar.
- Kif is-soppa tiftaħ tagħli baxxi n-nar u tektek għal 20 minuta, żid iz-zkuk u dak li tkun qlajt mill-weraq, niskata melħ u bżar mitħun frisk kompli tektek għal 20 minuta oħra.
- Itħan is-soppa u għaddiha minn passatur biex tiġbor il-biċċiet ħoxnin. Żid il-krema u l-kumplament tal-butir u erġa’ saħħan qabel isserviha.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!