Riċetta: Semifreddo tal-ħawħ u pistaċċ

Pistacchio and peach semifreddo Photo: Flickr/ Gourmandj

Ritratt: Flickr/ Gourmandj

Il-kulur dehbi tal-ħawħ flimkien mal-kulur aħdar jgħajjat tal-pistaċċ jagħtu lil din id-deżerta dehra sajfija u friska.

Ħin: 45 minuta

Isservi: 6

Ingredjenti:

  • 1 kg ħawħ isfar, imqaxxar, mingħajr għadma u mqatta’
  • 75 g pistaċċ imqaxxar
  • 600 ml krema doppja
  • 4 isfra tal-bajd
  • 75 g zokkor fin (caster sugar)

 

Tħejjija:

  1. Iksi landa tal-ħobż (loaf tin) ta’ 11 ċm x 21 ċm b’żewġ saffi cling film.
  2. Poġġi l-ħawħ fi blender u itħnu, imbagħad għaddih minn passatur.
  3. Saħħan taġen fuq nar moderat u inkalja l-pistaċċ għal madwar 5 minuti filwaqt li tqallbu kontinwament. Ħallih jibred u farrku.
  4. Saħħan il-krema f’kazzola sakemm taqbad tbaqbaq ftit u neħħiha minn fuq in-nar. B’ħabbata tal-elettriku ħabbat flimkien l-isfra tal-bajd u z-zokkor fi skutella sakemm ikollok taħlita ċara u ħafifa. Ferra’ l-krema sħuna filwaqt li tkompli tħabbat. Erġa’ ferra’ t-taħlita fil-kazzola u poġġiha fuq nar baxx. Ħawwad kontinwament għal 10 minuti sakemm il-konsistenza tagħha ssir bħal custard.
  5. Żid il-purè tal-ħawħ, ħawwad sew u ferra’ t-taħlita fil-landa ppreparata u ffriża għal sagħtejn jew sakemm kważi tagħqad. Kissirha b’mgħarfa u aqlibha fi skutella. Ħabbat it-taħlita ffriżata sakemm terġa’ tiġi lixxa, u żid il-pistaċċ. Erġa’ iksi l-landa b’żewġ saffi cling film u ferra’ t-taħlita fiha. Iffriża għal 5-6 sigħat jew sakemm tagħqad sew.
  6. Biex isservi aqleb is-semifreddo fuq platt tawwali ċatt u neħħilha l-cling film. Servi ma’ flieli ta’ ħawħ frisk.

Ippruvajtha din ir-riċetta ta' semifreddo tal-ħawħ u pistaċċ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jogħġbuk.

Would you like to read this recipe in English? Let us know in the comments section below!