Dawn l-iscones huma ideali biex tikolhom waħidhom jew biex isservihom ma’ insalati u platti tal-ħaxix differenti; anke sħan ma’ sopop fix-xitwa.
Ħin: 30 minuta
Kwantità: 10-12
Ingredjenti:
- 300 g dqiq self-raising
- 1½ kuċċarina trab tal-ħami (baking powder)
- ½ kuċċarina melħ fin
- 100 g ġobon feta
- 3 mgħaref kurrat selvaġġ (chives), imqatta’
- 160 ml ħalib
Tħejjija:
- Saħħan il-forn għal temperatura ta’ 180°C. idlek tilar jew dixx bi ftit żejt.
- Għarbel flimkien id-dqiq u t-trab tal-ħami fi skutella. Farrak il-ġobon feta u daħħlu fid-dqiq bil-ponot ta’ subgħajk. Żid il-kurrat selvaġġ u l-melħ u ħawwad. Żid 150 ml mill-ħalib u ħawwad sakemm l-ingredjenti jagħqdu. Aqleb it-taħlita fuq il-mejda u agħġinha sakemm tillixxa.
- Iftaħ l-għaġina għal ħxuna ta’ 2 ċm ħxuna u uża biscuit cutter ta’ 6 ċm biex taqta’ ċ-ċrieki. Għaqqad il-fdalijiet tal-għaġina u erġa’ iftaħha biex taqta’ aktar ċrieki sakemm tispiċċa. Poġġi ċ-ċrieki tal-għaġina fuq it-tilar ippreparat u idlek il-wiċċ bi ftit ħalib.
- Aħmi għal madwar 20 minuta jew sakemm tara li l-iscones telgħu u ħmaru.