Minħabba li t-tuffieħ jerħi l-likwidu tiegħu, din ir-riċetta tuża anqas likwidi oħrajn biex tgħaqqad it-taħlita tal-iscones. Jekk tuża l-istess ammont tispiċċa jkollok taħlita li aktar tixbah lil tal-cookies milli gallettini jew scones, li huma aktar xotti u jitfarrku. Dawn l-iscones l-aħjar li jittieklu sħan , imma jibqgħu tajbin għal jumejn u tista’ tiffriżahom ukoll.
Ħin: 30 minuta
Ingredjenti
Għal 12-il scone
- 1 tuffieħa, maħkuka (145g)
- 1 mgħarfa meraq tal-lumi jew lumiċell (lime)
- 2 kuċċarini qoxra maħkuka tal-lumi jew lumiċell
- 160g dqiq ismar (wholemeal)
- 90g dqiq
- 1 mgħarfa dqiq tal-ħami (baking powder)
- ½ kuċċarina soda tal-ħami (baking soda)
- ¼ kuċċarina melħ
- 55g ħafur (oats)
- 30g zokkor ismar
- 85g butir mingħajr melħ
- 60g jogurt naturali jew xorrox tal-butir (buttermilk)
- 60g ġewż pekan (pecan nuts) imqatta’
Metodu
- Saħħan il-forn għal temperatura ta’ 205°C.
- Iksi tilar bil-kartaforn.
- Ħawwad u iksi t-tuffieħa bil-meraq tal-lumi jew lumiċell.
- F’bieqja kbira għarbel flimkien id-dqiq kollu, il-melħ, u t-trab tal-ħami u tas-soda. Żid ukoll il-ħafur u z-zokkor.
- Żid il-butir u daħħlu bil-ponot ta’ subgħajk fl-ingredjenti nixfin sakemm isir bħal frak tal-ħobż.
- Żid it-tuffieħa u l-ġewż pekan u ħawwad sakemm jitħallat kollox. Żid biżżejjed jogurt jew xorrox tal-butir biex tgħaqqad it-taħlita.
- Aqleb it-taħlita fuq wiċċ bid-dqiq u fforma f’rettangolu, madwar 2ċm ħxuna.
- Qatta’ r-rettangolu f’6 kaxxi, imbagħad aqta’ kull kaxxa djagonali biex ikollok 12-il trijanglu. Tista’ wkoll tuża biscuit cutter u taqtagħhom ċrieki.
- Poġġihom fuq it-tilar ippreparat u aħmi għal 18-20 minuta, sakemm jiħmaru. Berred fuq gradilja.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
