Is-salsa hija tip ta' zalza daqsxejn taħraq li ġejja mill-Amerika t'Isfel. Mhux dejjem tkun likwida bħal kif aħna mdorrijin forsi nagħmlu mal-għaġin, iżda wkoll bħala tip ta' insalata. Ipprova din is-salsa tal-bżar aħdar li tmur tajjeb ħafna ma' xi riċetta Messikana tat-tacos (fittex taħt).
Tagħmel 2 kikkri; isservi 8 persuni.
Ingredjenti:
- 450 g bżar aħdar frisk
- 2 jew 3 felfel, preferibbilment jalapeño jew serrano. Neħħilhom iz-zokk u ż-żrieragħ
- 1/4 ta' kikkra basal abjad imqatta', imxarrab fl-ilma kiesaħ għal ħames minuti; neħħi l-ilma u laħlaħ
- 2 sinniet kbar tewm imqaxxar
- 1/2 kikkra kosbor (coriander) imqatta'
- Mgħarfa żejt Lesieur (sunflower oil)
- 2 kikkri stokk tat-tiġieġ jew tal-ħaxix
- Melħ skont il-gosti
Tħejjija:
- Poġġi l-bżar aħdar ġo kazzola, għatti bl-ilma u għalli sakemm ibaqbaq, imbagħad naqqas in-nar u ħallih itektek għal madwar 8-10 minuti sakemm jirtab u jsir aħdar skur. Qis li wara 4 minuti ddawwarhom.
- Neħħi l-ilma u poġġihom ġo blender. Żid il-felfel, il-basla mqattgħa, it-tewm, il-melħ u l-kosbor. Ibblendjahom sakemm isiru krema (purée).
- Saħħan iż-żejt ġo taġen kbir fuq nar medju-għoli. Itfa' ħarira mill-krema tal-bżar aħdar biex tara li ż-żejt jaħraq biżżejjed. Jekk jagħmel ħafna ħoss u jibda jtir jiġifieri tajjeb.
- Żid il-krema tal-bżar aħdar kollu u ħawwad kontinwament sakemm tagħqad u tibda teħel mat-taġen, għal madwar 5 minuti. Tkun taf li saret għax meta tifred iz-zalza fit-taġen jibqagħlek qisu kanal fin-nofs.
- Żid l-istokk u ħallih itektek, għal madwar 10 sa 15-il minuta minn meta jibda jtektek. Ħawwad spiss. Ikun lest meta l-imgħarfa tibqa' miksija minn quddiem u minn wara.
- Neħħi min-nar. Servi s-salsa sħuna jew fit-temperatura tal-kamra.
Preparazzjoni minn qabel:
Jekk tixtieq tipprepara s-salsa minn qabel, iżżomm tajjeb fil-friġġ għal madwar tlett ijiem. Tista' wkoll tiffriżaha.
Tista' tipprova din is-salsa ma' dawn ir-riċetti tat-tacos jekk tixtieq: