Din ir-riċetta ta’ rombli bil-mincemeat hija alternattiva għall-mincepies, huma verament faċli biex tagħmilhom u jimpressjonaw bid-dehra mhux tas-soltu tagħhom.
Ingredjenti
- 200g mincemeat
- Qoxra maħkuka u meraq ta’ 3 mandoliniet
- 375g għaġina sfirjulata (tal-friża)
- 2 mgħaref butir, imdewweb
- 4 mgħaref zokkor tal-ġelu (icing sugar), mgħarbul
- 1 bajda, imħabbta
Metodu
- Itħan il-mincemeat u l-qoxra u l-meraq tal-mandolin fi proċessur tal-ikel.
- Roxx bid-dqiq il-wiċċ li se taħdem fuqu u poġġi fuqu l-għaġina bit-tarf id-dejjaq in-naħa tiegħek. Iftaħha ftit aktar milli hi u aqsamha min-nofs għall-wisa’. Idlek iż-żewġ biċċiet għaġina bil-butir u roxx bi ftit zokkor tal-ġelu. Ifrex il-mincemeat fuq l-għaġina.
- Bin-naħa l-qasira faċċata tiegħek, gerbeb iż-żewġ naħat it-twal lejn in-nofs. Idlek in-nofs bil-bajd biex iż-żewġ naħat irrumblati jeħlu flimkien. Irrepeti l-proċedura bil-biċċa l-oħra tal-għaġina.
- Iksi tilar bil-kartaforn u bl-għajnuna ta’ paletta tella’ r-rombli fuqu. Kessaħ fil-friġġ għal 30 minuta.
- Saħħan il-forn għal temperatura ta’ 200°C.
- Oħroġ ir-rombli mill-friġġ u, b’sikkina taqta’, aqta’ biċċiet ta’ 1ċm ħxuna. Midd kull biċċa fuq it-tilar, bil-wiċċ il-maqtugħ ’il fuq. Idlek kull biċċa bil-butir imdewweb u roxx biz-zokkor tal-ġelu.
- Aħmi għal 15-20 minuta sakemm l-għaġina tintnefaħ u tieħu lewn dehbi.
- Neħħi r-rombli minn fuq it-tilar u ħallihom jibirdu fuq gradilja. Qabel isservi erġa’ roxx biz-zokkor tal-ġelu.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
