Dan il-mincemeat huwa ftit different mit-tradizzjonali għax fih frott different u ma fihx ix-xaħam (suet) li , fl-opinjoni tiegħi, ma jinħassx in-nuqqas tiegħu. Il-mincemeat nistgħu nużawh mhux biss biex nagħmlu l-mincepies iżda jidħol ukoll f’riċetti ta’ kejkijiet, torti u pastini. Għalhekk jekk jibqagħlek xi ftit żejjed tista’ terfgħu fil-friġġ u tużah f’okkażjonijiet oħrajn li mhux neċessarjament ikunu abbinati mal-Milied.
Ingredjenti
Għal madwar 1.5kg
- 3 tuffiħat
- 1 kuċċarina ħwawar imħalltin (mixed spice), mitħunin
- 1 kuċċarina trab tal-kannella
- 350g zokkor muscovodo
- Qoxra maħkuka u meraq ta’ 3 larinġiet
- Qoxra maħkuka u meraq ta’ lumija
- 350g cranberries, friski jew iffriżati
- 100g żbib
- 100g passolina
- 150g sultana
- 100g berquq niexef, imqatta’
- 175g lewż, inkaljat u mqatta’
- 300ml brandy jew sherry
Metodu
- Qaxxar, aqsam u neħħi ż-żerriegħa tat-tuffieħ u qattgħu biċċiet żgħar. Poġġih f’kazzola kbira flimkien mal-ħwawar, iz-zokkor, il-qxur u l-meraq tal-larinġ u l-lumija. Ħalli t-taħlita tiftaħ tagħli, għatti l-kazzola u tektek għal 10 minuti.
- Żid il-cranberries, iż-żbib, il-passolina, is-sultana u x-xorb. Erġa’ ħalli t-taħlita tiftaħ tagħli, baxxi n-nar u tektek mingħajr għatu għal 15-il minuta oħra. Żid il-berquq u l-lewż u ħawwad.
- Neħħi minn fuq in-nar. Ħalli l-mincemeat jiksaħ kompletament, imbagħad poġġih f’vażetti sterilizzati u ssiġillahom.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.