Read this in English: Recipe: Stuffed artichokes with cheese and herbs
Il-mili tal-qaqoċċ huwa versatili u jekk ikollok bażi ta’ frak tal-ħobż tista’ żżid miegħu diversi ingredjenti, bħal tonn taż-żejt, salamun afumikat, u ħxejjex aromatiċi varji. Din ir-riċetta hija ftit differenti għax mal-mili hemm żewġ tipi ta’ ġobon: provolone ħelu u Parmiġġan.
Ħin: siegħa u 15-il minuta
Isservi: 4 persuni
Ingredjenti:
- 4 dwawar ħobż tal-Malti, maħkuk
- 3 imgħaref ġobon provolone, maħkuk oħxon
- 3 imgħaref ġobon Parmiġġan, maħkuk oħxon; u aktar biex isservi
- 4 imgħaref tursin frisk, imqatta’; u aktar biex isservi
- 2 imgħaref origanu frisk, imqatta’
- 2 imgħaref ħabaq frisk, imqatta’
- 100 ml żejt taż-żebbuġa
- 4 qaqoċċiet kbar
- 4 basliet tat-tewm frisk, imqattgħin
- 2 basliet imdaqqsin, imqattgħin irqiq
- Lumija
- Melħ oħxon
- Bżar mitħun frisk
Tħejjija:
- Naddaf u pprepara l-qaqoċċ għall-mili; żomm iz-zkuk, qaxxarhom u qattagħhom irqiq. (Kif tipprepara l-qaqoċċ għal riċetti differenti).
- Saħħan iż-żejt f’kazzola fuq nar moderat. Żid iz-zkuk imqattgħin tal-qaqoċċ, il-basal u t-tewm u qalli sakemm jirtabu. Neħħi l-kazzola minn fuq in-nar u żid il-frak tal-ħobż, niskata melħ u bżar mitħun frisk. Ħawwad sew u ħalli t-taħlita tibred.
- Żid il-ġobon provolone u Parmiġġan u l-ħxejjex aromatiċi.
- Iftaħ il-weraq tal-qaqoċċ u b’subgħajk deffes it-taħlita bejn il-weraq ta’ kull qaqoċċa.
- Poġġi l-qaqoċċ weqfin ħdejn xulxin f’xibka (reċipjent) apposta li tidħol fil-borma biex jgħaddi l-fwar minnha.
- Ferra’ ftit żejt taż-żebbuġa fil-qalba ta’ kull qaqoċċa, u niżżel ix-xibka fil-borma. Imla bl-ilma sakemm tgħatti biss il-qigħan tal-qaqoċċ.
- Għatti l-borma sew u sajjar għal madwar 45 minuta jew sakemm il-weraq jinqala’ bla taħbit. Jekk tara li l-ilma qed jinxef tista’ żżid ftit aktar.
- Tella’ l-qaqoċċ mill-borma u servih b’aktar Parmiġġan u tursin frisk fil-wiċċ.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
