Fix-xhur tas-sajf nibdew naqtgħu ftit mil-ħami tal-kejkijiet, imma nsibu ħafna riċetti li jkun fihom ukoll ingredjenti sajfin u li jagħmluhom adattati wkoll għal dawn ix-xhur sħan, bħal din ir-riċetta li hi bejn kejk u torta.
Ħin: siegħa u 40 minuta
Isservi: 6-8 persuni
Ingredjenti:
- 10-12-il għanbaqra mill-ħomor ftit weqfin jew Santa Rosa, mingħajr għadma imqaxxrin u mqattgħin
- 60 g dqiq
Għat-taħlita tal-kejk:
- 2 bajdiet
- 100 g zokkor
- 100 g dqiq
- ½ kuċċarina trab tal-kannella (cinnamon)
- ½ kuċċarina essenza tal-vanilla
Għat-taħlita tal-wiċċ:
- Mgħarfa dqiq
- Mgħarfa mburġata zokkor ismar
- Kuċċarina trab tal-kannella (cinnamon)
- Niskata noċemuskata maħkuka
- 2 mgħaref ġewż, jew ġewż pekan (pecan nuts), imqatta’
- Mgħarfa butir, temperatura tal-kamra
Tħejjija:
- Saħħan il-forn għal temperatura ta’ 180°C. idlek turtiera jew landa ta’ 23 ċm djametru bil-butir.
- Poġġi l-għanbaqar imqatta’ fi skutella, roxx fuqu d-dqiq u ħallat sew sakemm jinkesa. Warrab għal iktar tard.
- Biex tagħmel it-taħlita tal-kejk: B’ħabbata tal-elettriku ħabbat flimkien il-bajd u z-zokkor sakemm it-taħlita tibda ttella’ r-ragħwa. Żid it-trab tal-kannella u l-essenza tal-vanilla, imbagħad żid id-dqiq bil-mod sakemm jitħallat sew u jkollok taħlita kremuża.
- Biex tagħmel it-taħlita tal-wiċċ: Ħallat flimkien id-dqiq, iz-zokkor ismar, it-trab tal-kannella , in-noċemuskata u l-ġewż. Żid il-butir u ħabbat b’mgħarfa tal-injam sakemm il-butir ma jibqax jidher.
- Biex tgħaqqad, ferra’ t-taħlita tal-kejk fil-landa, ferrex l-għanbaqr fuq il-wiċċ u agħfsu b’mgħarfa biex iddaħħlu fit-taħlita. Ferrex it-tħalita tal-ġewż fil-wiċċ.
- Aħmi għal 50-60 minuta jew sakemm il-kejk jogħla u jiħmar. Ħalli l-kejk jibred sew fil-landa qabel taqilgħu biex isservih.
