Iċ-cheesecakes tal-frott, speċjalment dak frisk, huma fost l-aktar popolari. Għalkemm il-mango hija frotta Ażjatika, f’Malta nsibu nixtruha faċilment. It-togħma ħelwa,u l-konsistenza tagħha meta titħanha, u l-kulur sabiħ tagħha, jagħmluha frotta perfetta għal cheesecake.
Ħin: 50 minuta, u ħin biex tkessaħ
Isservi: 8 persuni
Ingredjenti:
Għall-bażi tal-gallettini:
- 200 g gallettini tal-ġinġer imfarrkin fin (tista’ tuża wkoll gallettini digestive)
- 100 butir, imdewweb
Għall-mili:
- 125 g zokkor fin (caster sugar)
- 250 g ġobon artab
- 250 g irkotta
- 250 ml krema doppja, imħabbta
- ½ kuċċarina essenza tal-vanilla
- 3 mgħaref ilma jaħraq
- 3 mgħaref ġelatina
- 2 mangoes, imqaxxrin u mqattgħin
Għall-glaze:
- 2 mangoes, imqaxxrin u mqattgħin
- 2 mgħaref ilma jaħraq
- Mgħarfa ġelatina
- Mgħarfa zokkor fin (caster sugar)
Tħejjija:
- Biex tagħmel il-bażi: Poġġi l-gallettini u l-butir imdewweb fi skutella u ħallathom sew. Ifrex it-taħlita fil-qiegħ ta’ landa tonda (bil-qiegħ jinqala’) ta’ 23 ċm u agħfasha sew b’mgħarfa mal-qiegħ. Poġġi l-landa fil-friġġ.
- Biex tagħmel il-mili: Itħan il-mangoes fi proċessur tal-ikel. Dewweb kompletament it-3 mgħaref ġelatina fit-3 mgħaref ilma jaħraq u żidhom mal-purè tal-mangoes. Ħabbathom tajjeb flimkien.
- Fi skutella ħabbat flimkien il-ġobon artab u l-irkotta, imbagħad żid iz-zokkor u kompli ħabbat. żid il-krema mħabbta u t-taħlita tal-mangoes u ġelatina u ħawwad kollox sew flimkien. Ifrex it-taħlita fuq il-gallettini fil-landa u erġa’ daħħalha fil-friġġ.
- Sadanittant ipprepara l-glaze għall-wiċċ. Itħan il-mangoes sakemm isiru purè. Dewweb il-ġelatina fl-ilma jaħraq, żid iz-zokkor u ħawwad sakemm jinħall ukoll. Żid din it-taħlita mal-purè tal-mangoes u ħawwad kollox sew. Ifrex it-taħlita fuq iċ-cheesecake fil-landa, illixxa l-wiċċ u erġa’ daħħalha fil-friġġ għal 4-6 sigħat sakemm tagħqad sew jew tul il-lejl.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.