Jekk ma tafx x’ser tagħmel għall-ikel illum, żgur għandek issib dawn iż-żewġ ingredjenti bażiċi fil-kċina tiegħek. Flimkien ma’ ftit ħaxix u ħass, li m’hemmx għalfejn ikunu eżatt bħal ta’ din ir-riċetta, issolvi l-problema.
Ħin: 25 minuta
Isservi: 4 persuni
Ingredjenti:
- 4 bajdiet
- 300g fażola twila (green beans), imnaddfa; tista’ tuża wkoll tal-friża
- 150 g ħass ikkabuċċjat; tista’ tuża wkoll ħass imħallat jew tal-għażla tiegħek
- 2 bżariet ħomor, imqattgħin irqiq
- Basla żgħir, imqattgħa roti rqaq
- 2 tadamiet, imqattgħin flieli
- 4 mgħaref kappar, imlaħlaħ
- 320 g tonn taż-żejt, imsaffi
- 4 mgħaref mayonnaise
- 4 mgħaref żejt taż-żebbuġa
- Meraq ta’ nofs lumija
- Melħ u bżar mitħun frisk
Tħejjija:
- Poġġi l-bajd f’kazzola u għattih bl-ilma. Poġġih fuq in-nar u għalli bil-mod għal 7 minuti, imbagħad saffih mill-ilma, kessħu taħt l-ilma kiesaħ, u qaxxru.
- F’kazzola bl-ilma jagħli itfa’ l-fażola għal 3-4 minuti jew sakemm tirtab ftit mingħajr ma titlef il-kulur, imbagħad saffiha mill-ilma.
- Irranġa l-ħass, il-bżar aħmar, it-tadam, il-basal u l-fażola fuq il-platti. Aqsam kull bajda f’erba’ biċċiet għat-tul u poġġihom fuq il-platti wkoll. Roxx kull platt bi ftit żejt taż-żebbuġa, melħ u bżar mitħun frisk.
- Fi skutella farrak it-tonn taż-żejt b’furketta. Żid il-meraq tal-lumi u l-mayonnaise u għaffeġ kollox flimkien. Qassam it-taħlita fuq il-platti u roxx il-kappar fuq kollox.
