Din l-insalata fiha taħlita ta’ ħxejjex misjurin u oħrajn nejjin, imma fl-aħħar mill-aħħar ir-riżultat huwa insalata sħuna.

Ħin: 25 minuta

Isservi: 6 persuni

Ingredjenti:

• 5 mgħaref żejt taż-żebbuġa
• Basla, maqsuma min-nofs u mqattgħa rqiq għat-tul
• ½ basla tal-bużbież, imqattgħa rqiq
• 300 g kaboċċa ħadra, imqattgħa rqiq għat-tul
• 300 g kaboċċa ħamra, imqattgħa rqiq għat-tul
• Karrotta, imqaxxra u maħkuka oħxon
• Ponn tursin frisk, imqatta’
• Kuċċarina mustarda
• Kuċċarina żerriegħa tal-mustarda (wholegrain mustard)
• Kuċċarina għasel
• Mgħarfa ħall balsamiku

Tħejjija:    

1. Fi skutella żgħira ħabbat flimkien il-mustarda, iż-żerriegħa tal-mustarda, l-għasel, 4 mgħaref miż-żejt taż-żebbuġa u l-ħall balsamiku.
2. Saħħan l-imgħarfa żejt li jkun fadal f’taġen fuq nar moderat u qalli l-basla u l-basla tal-bużbież għal 2 minuti.
3. Żid il-kaboċċa l-ħamra u qalli għal 3 minuti oħra.
4. Aqleb it-taħlita fi skutella, żid il-kaboċċa ħadra,  il-karrotti u t-taħlita likwida u ħawwad kollox flimkien.
5. Roxx it-tursin fil-wiċċ u servi l-insalata sħuna.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!