Read this recipe in English: Baked mashed potato florets
Din ir-riċetta tal-patata hija eċċellenti biex tipprepara t-taħlita, tifformahom u tħallihom fil-friġġ biex iddaħħalhom fil-forn 20 minuta qabel isservihom. B’hekk tkun qed tiffranka ħafna xogħol dakinhar tal-ikla jekk ikkollok il-mistednin, għax ikollok wieħed mill-kontorni kważi lest. Jekk se jkollok ukoll it-tfal għall-ikel, ħu ħsieb biex tagħmel ammont akbar għax mat-tfal din il-patata tintgħoġob ħafna.
Isservi: 4 persuni
Ingredjenti:
- 900g patata mill-bajda, imqaxxra u mqattgħa biċċiet kbar
- Melħ
- Bżar mitħun frisk
- ¼ kuċċarina noċemuskata (nutmeg) mitħuna
- ¼ kikkra krema doppja
- 4 mgħaref butir
- 3 isfra tal-bajd
Metodu
- Poġġi l-patata f’kazzola kbira u għattiha bl-ilma. Żid kuċċarina melħ u poġġiha l-kazzola fuq nar għoli. Kif tagħli baxxi n-nar u ħalliha ttektek għal 20-25 minuta jew sakemm tirtab.
- Sadanittant dewweb żewġ imgħaref mill-butir u ħallihom għas-sħana għal aktar tard. Saħħan il-forn għal temperatura ta’ 230°C.
- Saffi l-patata f’passatur u rritornaha fil-borma. Poġġi l-borma fuq nar baxx ħafna u ħalli l-ilma li terħi l-patata jevapora, madwar minuta. Neħħi minn fuq in-nar, żid 2 mgħaref butir u għaffeġ b’masher. Żid in-noċemuskata , bżar u l-krema doppja u kompli għaffeġ kollox flimkien. Fl-aħħar żid il-melħ u l-isfra tal-bajd u kompli għaffeġ sakemm jitħallat kollox.
- Uża piping bag b’forma ta’ stilla kbira fit-tarf u fforma l-fjuri tal-patata fuq tilar midluk bil-butir. Idlek il-patata bil-butir imdewweb u aħmi għal 20 minuta jew sakemm jiħmaru.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.
