Għal din ir-riċetta nuża l-bżaru aħmar frisk. Jekk ma tantx tħobb l-ikel pikkanti ħalli t-trab tal-bżar aħmar barra u neħħilu ż-żerriegħa friska qabel ma tibda t-tisjir. Dan hu platt ħafif ħafna biex issajru u ma tantx għandek bżonn preparazzjoni. Sirt inħobb nuża l-laħam tal-fenek bħala alternattiva oħra f'riċetti ta' laħam abjad.

Għandek bżonn:

4 koxox laħam tal-fenek
Mgħarfa żejt
Kikkra nbid abjad
4 sinniet tewm, maħkuka
2 basliet imqattgħa rqaq
2 bżariet ħomor żgħar pikkanti, imqattgħa u bla żerriegħa
Nofs kuċċarina trab tal-bżar aħmar (żid biss jekk togħġbok togħma iktar pikkanti)
4 patatiet, imqaxxra u mqattgħa tond irqiq
Melħ u bżar għat-togħma
Tursin imqatta' biex iżżejjen il-wiċċ.

 Metodu:

Saħħan iż-żejt ġo taġen u sajjar il-basal. Żid il-bżar aħmar, it tewm u t-trab tal-bżar jekk se tużah. Żid l-inbid; għatti t-taġen, baxxi n-nar u sajjar.

Saħħan il-forn għal 180 °C u uża dixx b'għatu jew tista' tiksi bil-fojl. Dellek id-dixx bi ftit żejt. Iksi l-qiegħ bil-patata mqattgħa rqiqa. Fuq il-wiċċ irranġa l-koxox tal-fenek.  Żid il-kontenut tat-taġen.

Sajjar fil-forn għal 45 minuta. Oħroġ mill-forn. Ħalli d-dixx joqgħod għal 5 minuti. Ikxef, żejjen bit-tursin imqatta' u servi.

Ippruvajt din ir-riċetta?  Kif sibtha? Għidilna billi tħalli kumment hawn taħt.