Read this in English: Recipe: Perfect crêpes
Il-crêpes huma versatili immens għax tista’ toħloq platt bħalha ikla bihom u tista’ wkoll isservihom bħalha deżerta. Fiż-żewġ każi jistgħu jiġu kkumbinati ma’ ingredjenti varji biex kull darba toħloq riċetta ġdida bl-istess bażi ta’ crêpes. Ħafna drabi l-ewwel crêpe ma tiġix perfetta u forsi jkollok tirregola s-saħħa tan-nar jew l-ammont ta’ taħlita li titfa’ fit-taġen. Żerżaq kull waħda li tlesti għal fuq platt. Tista’ tqegħedhom fuq xulxin għax ma jeħlux. Bejn kull 2 jew 3 crêpes erġa’ idlek it-taġen biż-żejt. Tista’ terfa’ l-crêpes fil-friġġ għal 3 ijiem, magħluqin fil-plastik, u ssaħħanhom fit-taġen qabel tużahom.
Ħin: 30 minuta
Tagħmel: 14-16-il crêpe
Ingredjenti:
- 250 g dqiq, mgħarbul
- 600 ml ħalib
- 50 g butir, imdewweb
- 2 bajdiet
- Niskata melħ
- Żejt biex tidlek
Tħejjija:
- Ħabbat flimkien il-bajd u l-ħalib f’bieqja. Żid ftit ftit id-dqiq filwaqt li tkompli tħabbat. Żid il-melħ u l-butir imdewweb u ħawwad.
- Ħalli t-taħlita toqgħod għal nofs siegħa qabel tibda tagħmel il-crêpes; jekk tkun se ddewwimha aktar, għattiha u poġġiha fil-friġġ.
- Idlek taġen non-stick b’qiegħ ta’20 ċm biż-żejt u saħħnu fuq nar moderat.
- Tella’ daqs kuċċarun żgħir mit-taħlita u, filwaqt li tgħolli t-taġen minn fuq in-nar b’id waħda, bl-id l-oħra ferra’ t-taħlita bil-mod fit-taġen. Dawwar it-taġen biex it-taħlita tinfirex mal-qiegħ kollu. Jekk jibqa’ xi parti vojta imlieha bi ftit qtar tat-taħlita.
- Kif ix-xfar jibdew jiħmaru, għolliha ftit bi spatula u jekk tkun ħmaret aqlibha fuq il-wiċċ l-ieħor sakemm tiħmar minn din in-naħa wkoll.
Ippruvajt din ir-riċetta? Kif sibtha? Għidilna billi tħalli kumment u r-rating tiegħek hawn taħt u agħfas share.
