Riċetta: Crêpes biz-zalza tal-klementin

Recipe: Crêpes with clementine sauce Recipe: Pancakes with whipped cream Riċetta: Crêpes biz-zalza tal-klementin

See this recipe in English: Crêpes with clementine sauce

Deżerta faċli li tisserva sħuna għalhekk adattata għal ġranet kesħin. Il- crêpes tista’ tippreparahom minn qabel biex fl-aħħar tagħmel iz-zalza u sservihom. Din ir-riċetta hija ftit different għax normalment il-meraq maz-zalza jkun tal-larinġ, imma din id-darba qed nużaw meraq tal-klementin jew, jekk tippreferi, tal-mandolin. It-tnejn jagħtu togħma aktar sottili mil-larinġ.

Ħin: 35 minuta

Isservi: 4 persuni

Ingredjenti:

  • 2 mgħaref zokkor
  • 75 ml għasel
  • 300 ml meraq tal-klementin jew mandolin
  • 2 mgħaref butir
  • 225 ml krema doppja
  • 2 kuċċarini zokkor tal-ġelu (icing sugar)
  • 2 kuċċarini liqueur tal-larinġ
  • 8 crêpes 
  • Krema friska biex isservi

Tħejjija:

  1. Saħħan iz-zokkor ma’ 2 mgħaref ilma f’taġen u ħawwad sakemm jinħall iz-zokkor u t-taħlita tibda tagħli. Ħalli t-taħlita fuq in-nar mingħajr ma tħawwad għal 4 minuti, sakemm tieħu kulur dehbi ċar.
  2. Żid l-għasel u ħawwad għal 2 minuti, sakemm tiskura ftit ieħor. Jekk tibda tbaqbaq ħafna baxxi ftit in-nar biex ma tfurx.
  3. Neħħi t-taġen minn fuq in-nar u bil-mod żid il-meraq tal-klementin. Hawn it-taħlita tibda tfexfex u tirrikjedi ftit attenzjoni.
  4. Erġa’ poġġi t-taġen fuq nar baxx u ħawwad biex tħoll xi biċċiet li jista’ jkun hemm, sakemm il-karamel ikollu konsistenza lixxa u ftit magħquda; madwar 3-4 minuti. Żid il-butir u ħawwad. Żomm għas-sħana fuq nar baxx ħafna.
  5. Ħabbat il-krema doppja b’ħabbata tal-elettriku għal 2-3 minuti, sakemm tagħqad u tibqa’ wieqfa. Żid il-liqueur u z-zokkor tal-ġelu u kompli ħabbat għal minuta oħra.
  6. Itwi kull crêpe f’erbgħa biex tifforma trijangoli. Poġġihom ħdejn xulxin fit-taġen u ħallihom jixorbu ftit miz-zalza tal-karamel. Aqlibhom bil-galbu fuq in-naħa l-oħra u ħallihom għal minuta oħra.
  7. Poġġihom fuq il-platti u servihom fil-pront bil-krema friska fuq il-ġenb.

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.