Riċetta: Pinen bit-tiġieġ u tadam imqadded

Penne chicken sundried tomato

Naħseb li l-pinen huma l-aktar tip ta’ għaġin qasir favorit ma’ ħafna. Dan forsi hu għall-fatt li huwa faċli biex tieklu u jiġbor ħafna miegħu z-zalza.

Ħin: 30 minuta

Isservi: 4 persuni

Ingredjenti:

  • 350 g għaġin pinen
  • 500 g sidra tat-tiġieġ, imqattgħa dadi
  • mgħarfa żejt taż-żebbuġa
  • 4 sinniet tewm, imqattgħin
  • Bżaru filfel (jekk trid), mingħajr żerriegħa u mqatta’ rqiq
  • 125 g tadam imqadded imqatta’ srtixxi
  • 150 ml inbid abjad
  • 150 ml krema singla
  • Melħ u bżar mitħun frisk
  • Ponn ħabaq frisk, imqatta’
  • 100 g ġobon Parmiġġan, maħkuk

Tħejjija:

  1. Għalli l-għaġin f’borma kbira ilma bil-melħ sakemm isir al dente.
  2. Sadanittant, saħħan iż-żejt taż-żebbuġa f’taġen kbir u żid il-biċċiet tat-tiġieġ. Ħawwadhom sakemm jieħdu l-kulur u żid it-tewm u t-tadam, u l-filfel jekk se tużah. Kompli sajjar għal minuta u żid l-inbid, imbagħad kif jibda jbaqbaq żid ukoll il-krema, il-ġobon Parmiġġan u nofs il-ħabaq, melħ u bżar. Baxxi n-nar u tektek għal 5 minuti.
  3. Saffi l-għaġin u żidu maz-zalza fit-taġen. Ħawwad kollox flimkien sew.
  4. Servi fil-pront b’aktar ħabaq fil-wiċċ.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.