Read this in English: Recipe: Avocado, feta and crouton salad
L-insalati huma faċli biex tippreparahom fi ftit ħin, imma kultant nevitawhom għax inkunu nixtiequ xi ħaġa aktar biex timliena. Din l-insalata hija s-soluzzjoni għax fiha biċċiet ta’ ħobż Malti jqarmċu li jagħmlu din l-insalata ikla sodisfaċenti.
Ħin: 30 minuta
Issevi: 4 persuni
Ingredjenti:
- 500 g qalba tal-ħobż tal-Malti ftit xotta, imqattgħa dadi ta’ 2 ċm
- 300 g tadam ċirasa, maqsum min-nofs
- Basla żgħira ħamra, imqattgħa flieli rqaq
- 150 g ġobon feta, imqatta’ dadi
- Ħjara żgħira, maqsuma min-nofs għat-tul, imbagħad irqiq għall-wisa’
- 100 g żebbuġ iswed, mingħajr għadma
- Ponn weraq tal-ħabaq frisk, imqatta’
- Ponn weraq tat-tursin frisk, imqatta’
- 2 avokado misjurin, imqaxxrin u mqattgħin dadi
- Meraq ta’ nofs lumija
- 4 mgħaref żejt taż-żebbuġa
- 2 imgħaref ħall balsamiku
- Melħ u bżar mitħun frisk
Tħejjija:
- Poġġi l-ħobż fi skutella, roxx bil-melħ u l-bżar u ħawwad.
- Saħħan 2 imgħaref żejt taż-żebbuġa f’taġen fuq nar moderat u żid il-ħobż. Qalleb sikwit sakemm il-ħobż jieħu l-kulur mingħajr ma jinħaraq.
- Fi skutella wiesgħa ħallat it-tadam, il-basal, il-ħjar, iż-żebbuġ, l-avokado, il-ġobon feta, il-ħabaq u t-tursin.
- Fi skutella żgħira ħabbat flimkien iż-żewġ imgħaref żejt taż-żebbuġa, il-ħall balsamiku, il-meraq tal-lumi, melħ u bżar. Ferra’ din it-taħlita fuq l-insalata u ħawwad sakemm jinkesa kollox.
- Qabel isservi eżatt żid il-ħobż, ħawwad u servi fil-pront.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
