F’din ir-rċetta tista’ tibdel u tuża zalzett ieħor minflok tal-Malti. Importanti li tfawwar iz-zalzett għal ftit minuti biex tevita kemm jista’ jkun il-melħ u x-xaħmijiet.
Ħin: 50 minuta
Isservi: 4 persuni
Ingredjenti:
- 12-16 faqqiegħ
- Mgħarfa żejt taż-żebbuġa
- 300 g zalzett tal-Malti, imfawwar u miftuħ
- 50 g frak tal-ħobż niexef
- 100 g ġbejniet bojod maħkukin
- 100 g mozzarella, maħkuka
- 2 sinniet tewm, imqattgħin
- Basla żgħira jew nofs basla, imqattgħa rqiq
- 2 mgħaref tursin frisk, imqatta’
- Bżar mitħun frisk
- 2 mgħaref ġobon kefalotiri (tal-ħakk), maħkuk
Tħejjija:
- Saħħan il-forn għal temperatura ta’ 200°C. Iksi tilar bil-kartaforn.
- Bil-mod aqla’ z-zkuk tal-faqqiegħ. Poġġi l-faqqiegħ bil-vojt ’il fuq fit-tilar, u qatta’ z-zkuk.
- Saħħan iż-żejt taż-żebbuġa f’taġen fuq nar moderat u żid il-basla. Qalli sakemm tibda tirtab u żid it-tewm u z-zkuk tal-faqqiegħ, u qalli sakemm jinxtorob il-likwidu. Żid ukoll il-laħam taz-zalzett u l-frak tal-ħobż. Fl-aħħar żid il-ġbejniet, il-mozzarella, it-tursin u bżar, u ħallat kollox sew.
- B’mgħarfa imla l-faqqiegħ u mburġah sew bit-taħlita. Roxx il-ġobon kefalotiri fil-wiċċ u daħħal il-faqqiegħ mimli fil-forn għal 15-20 minuta, jew sakemm tara li l-faqqiegħ irtab ftit u l-mili ħa kulur ħamrani.
- Servi l-faqqiegħ ma’ insalata.
