Kif tnaddaf il-kurrat

Leek

Il-kurrat ġej mill-familja tal-basal, għalkemm it-togħma tiegħu hija ifjen. Ħafna drabi tista’ tuża l-kurrat minflok il-basal, speċjalment fi zlazi u sopop.

Il-parti l-bajda u l-parti ħadra ċara huma l-partijiet tajbin biex jittieklu, għalkemm il-parti ħadra skura tista’ tintuża biex tagħmel l-istokk.

Il-parti li tkun moħbija mix-xemx hija l-aktar parti tarja u, minħabba hekk, meta jkun qed jitkabbar jgħollulu kemm jista’ jkun il-ħamrija madwar iz-zokk biex tiġi moħbija mix-xemx. Għalhekk meta nixtru l-kurrat insibu li bejn il-weraq ikun mimli ħamrija u jkollna bżonn innaddfuh sew qabel insajruh.

Jekk se tużah għal xi zalza jew soppa u trid tqattgħu żgħir l-ewwel m’għandek tagħmel hu li tlaħalħu sħiħ taħt l-ilma biex tneħħi dak li jidher. Imbagħad aqsmu min-nofs għat-tul, aqta’ l-parti ħadra skura u warrabha jekk se tużaha biex tagħmel stokk. Qatta’ l-kurrat mill-wisa’ (nofs tond) u poġġih f’passatur. Laħalħu taħt l-ilma, imbagħad poġġih f’bieqja bl-ilma u b’idejk dawru u ċaqalqu biex tnaddfu aħjar. Erġa’ saffih mill-ilma fil-passatur.

Jekk il-kurrat għandek bżonnu sħiħ poġġih fuq board, daħħal il-ponta ta’ sikkina taqta’ madwar ½ċm ’l isfel mill-ewwel ftuħ tal-weraq u aqta’ dritt ’il fuq minn ġol-parti skura sat-tarf tal-kurrat. B’hekk tkun qed tħalli l-aktar partijiet ċari tal-kurrat sħaħ. Iftaħ il-parti fejn qsamt bħal imrewħa u laħlaħ taħt l-ilma biex tneħħi kull ħmieġ li jkun maqbud bejn il-weraq. Aqta’ barra l-partijiet skuri u t-tarf tar-ras qrib l-għeruq.

 

 Kif sibthom dawn s-suġġerimenti? Ħalli l-kumment tiegħek hawn taħt.