It-tadam isebbaħ platt, kemm bid-dehra u kemm bil-kulur. Kultant insibu nixtru tadam li jkun qisu tal-istampi u ħasra titliflu d-dehra tiegħu meta tqattgħu jew tagħsru. Din ir-riċetta tħalli t-tadam fil-forma sħiħa tiegħu, imma mimli bil-kuskus. Dan il-platt jista’ jkun ikla ħafifa, tista’ sservih bħala l-ewwel platt, kif ukoll bħala kontorn ta’ laħam jew tiġieġ.
Ħin: 40 minuta
Kwantità: 12
Ingredjenti:
- 12-il tadama mit-tond ftit kbar u biz-zokk
- Meraq ta’ lumija
- 190 g kuskus
- 4 tiniet imqaddin, imqattgħin irqiq
- 2 mgħaref lewż inkaljat ħafif u mkisser
- ½ kuċċarina trab tal-kannella
- 250 g yoghurt naturali
- Mgħarfa meraq tal-lumi
- Sinna tewm, misħuqa
- 2 mgħaref nagħniegħ frisk, imqatta’
- Żejt taż-żebbuġa
- Melħ u bżar mitħun frisk
Tħejjija:
- Aqta’ barra l-kappell ta’ kull tadama u ħallih biz-zokk. B’kuċċarina neħħi l-ġewwieni biż-żerriegħa tan-nofs. Poġġi t-tadam vojt f’dixx midluk biż-żejt taż-żebbuġa.
- Saħħan il-forn għal temperatura ta’ 200°C.
- Żid misħun biżżejjed mal-meraq ta’ lumija sħiħa sakemm ikollok 250 ml. Poġġi l-kuskus fi skutella żgħira u ferra’ l-misħun fuqu, u ħallih joqgħod għal 10 minuti. Tella’ l-kuskus b’furketta u żid it-tin, il-lewż u t-trab tal-kannella, melħ u bżar, u ħawwad.
- Imla’ t-tadan fid-dixx bit-taħlita tal-kuskus , poġġi l-għatu fuq kull waħda u idlikhom biż-żejt taż-żebbuġa. Aħmi għal 15-il minuta.
- Fi skutella ħallat flimkien il-yoghurt, it-tewm, mgħarfa meraq tal-lumi u n-nagħniegħ, u servih mat-tadam.
