Ir-ravjul insibu nixtruh lest b’mili varju, imma l-aktar popolari dejjem jibqa’ l-mili tal-irkotta. Għal din ir-riċetta l-mili se jibqa’ tal-irkotta, imma biż-żieda tal-piżelli li bħalissa huwa fl-istaġun (tistgħu tużaw ukoll tal-friża). Iz-zalza hija sempliċi u tikkumplimenta lil dan ir-ravjul bit-togħma tas-salvja.
Ħin: siegħa u 15-il minuta
Isservi: 4 persuni
Ingredjenti:
Għall-għaġina:
- 500 g dqiq, mgħarbul
- Niskata melħ
- 4 bajdiet
- Semolina, biex tiftaħ l-għaġina
Għall-mili:
- 150 g piżelli, mgħollija u mgħaffġa
- 350 g irkotta
- 150 g ġobon Parmiġġan, maħkuk
- Bajda
- Melħ u bżar mitħun frisk
Għaz-zalza:
- 125 g butir
- Weraq tas-salvja friska
Tħejjija:
- Ferra’ d-dqiq fuq il-mejda u geddsu flimkien. B’idek ifforma ħofra fin-nofs tiegħu. Ofsoq il-bajd f’din il-ħofra u b’furketta ħabbtu ftit, imbagħad ibda iġbed ukoll ftit ftit id-dqiq minn mad-dawra biex tifforma l-għaġina. Agħġen b’idejk sakemm ikollok għaġina lixxa u tiġġebbed. Geżwirha fil-cling film u poġġiha fil-friġġ għal 30 minuta.
- Sadanittant ipprepara l-mili. Fi skutella jew fi proċessur tal-ikel għaffeġ tajjeb flimkien l-irkotta u l-piżelli. Żid il-bajda, nofs il-ġobon Parmiġġan u melħ u bżar.
- Roxx il-mejda bis-semolina u iftaħ l-għaġina għat-tul irqiqa kemm jista’ jkun. Poġġi kuċċarina mimlija bit-taħlita tal-irkotta u piżelli fi spazji ta’ madwar 8 ċm. Idlek bi ftit ilma t-truf tal-għaġina u bejn kull mili u aqleb tarf wieħed tal-għaġina fuq l-ieħor biex tagħlaq il-mili fin-nofs. B’rota li taqta’ l-għaġina aqta’ nofs ċrieki biex tifforma r-ravjul, imbagħad agħfas sew it-truf ta’ kull wieħed b’subgħajk jew bit-tarf ta’ furketta.
- Saħħan borma bl-ilma bi ftit melħ fuq nar għoli.
- Sadanittant ipprepara z-zalza. F’taġen kbir dewweb il-butir fuq nar moderat u ħallih sakemm jibda jieħu kulur dehbi. Żid il-weraq tas-salvja, ħawwad u itfi n-nar.
- Għalli r-ravjul għal madwar 4-5 minuti u saffih mill-ilma. Żidu mal-butir fit-taġen u ħawwad bil-mod biex ir-ravjul jinkesa bil-butir.
- Servi fil-pront bil-kumplament tal-ġobon Parmiġġan fil-wiċċ.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
