Fl-Irlanda taħlita ta’ patata mgħaffġa u tipi differenti ta’ kaboċċi tissejjaħ colcannon. Din ir-riċetta fiha ammont akbar ta’ zunnarija u zunnarija bajda, li t-togħmiet tagħhom jixxiebhu, milli ta’ patata. Peress li z-zunnarija l-bajda jkollha xi ħjut, ikun aħjar jekk tgħaddiha minn passatur jew mitħna tal-ikel.
Ħin: 45 minuta
Ingredjenti
Għal 6 porzjonijiet
- 285g patata, maħsula sew
- 450g karrotti, imqaxxra, maqsuma għat-tul f’erbgħa u mqattgħa f’biċċiet ta’ 8ċm
- 450g zunnarija bajda (parsnips), imqaxxra, maqsuma għat-tul f’erbgħa u bin-nofs imneħħi, u mqattgħa f’biċċiet ta’ 8ċm
- Melħ
- 1 mgħarfa żejt taż-żebbuġa ekstra verġni
- 1 kurrata, il-biċċa bajda u ħadra ċara biss, imnaddfa u mqattgħa
- 2-3 mgħaref butir mingħajr melħ
- ¾ kikkra ħalib
- Bżar mitħun frisk
- 1 mgħarfa xibt imqatta’ frisk (jekk trid)
Metodu
- Poġġi l-patata, il-karrotti u z-zunnarija bajda f’kazzola u iksi b’2.5ċm ilma. Żid il-melħ u poġġi l-kazzola fuq in-nar sakemm l-ilma jiftaħ jagħli, imbagħad baxxi n-nar u għatti l-kazzola parzjalment. Ħalliha ttektek għal 25-30 minuta, sakemm il-ħaxix jirtab.
- Saffi mill-ilma u erġa’ għalaq kollox bl-għatu biex iżomm il-fwar għal 5 minuti. Qaxxar il-patata.
- Sadanittant saħħan iż-żejt taż-żebbuġa f’taġen u żid il-kurrat. Qalli għal 5 minuti sakemm tibda titbiel.
- Żid il-melħ u kompli qalli għal 5 minuti oħra.
- Għaffeġ il-patata, il-karrotti u z-zunnarija bajda flimkien.
- Saħħan il-ħalib u l-butir flimkien sakemm idub il-butir. Żid mal-purè tal-ħaxix u ħawwad sakemm ikollok taħlita lixxa.
- Żid il-kurrat u melħ u bżar u ħawwad sew.
- Għaddi t-taħlita minn passatur jew mitħna tal-ikel.
- Żejjen bix-xibt frisk u servi sħun.
Tista’ tipprepara l-colcannon il-ġurnata ta’ qabel u ssaħħanha billi tagħmilha banjumarija, jew tpoġġiha f’forn b’nar baxx, b’biċċa butir fil-wiċċ biex ma tinxifx.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
