Qegħdin fl-istaġun tal-ful frisk, u qarabagħli fis-suq hawn ukoll. Kultant is-sempliċità ta’ żewġ ħxejjex flimkien imħawrin b’ingredjenti oħra joħolqu kontorn tajjeb u sabiħ jew jistgħu ikunu wkoll ikla veġetarjana servuti ma’ ħobż frisk.
Preparazjoni: 15-il minuta
Ħin totali: 30 minuta
Isservi: 4 persuni (bħala kontorn)
Ingredjenti:
- 4 qarabagħliet mit-twil imdaqqsin
- Kilo ful fil-miżwed (200 g imfesdaq)
- 2 imgħaref żejt taż-żebbuġa
- Mgħarfa nagħniegħ frisk, imqatta’
- 10 nofsijiet tal-ġewż, imqattgħin
- Melħ u bżar mitħun frisk
- Mgħarfa ħall tal-inbid abjad
- 50 ml żejt taż-żebbuġa
Tħejjija:
- Fi skutella ħabbat flimkien il-50 ml żejt taż-żebbuġa u l-ħall. Warrab għal iktar tard.
- F’kazzola bl-ilma għalli l-ful għal 3 minuti, imbagħad saffih u poġġih fi skutella ilma kiesaħ. Xħin jibred qaxxru mit-tieni qoxra.
- Qatta’ l-qarabagħli djagonali fi ċrieki ta’ 5 mm ħxuna.
- Saħħan iż-żewg imgħaref żejt f’taġen fuq nar moderat u żid il-qarabagħli. Aqli għal 5-8 minuti jew sakemm jieħdu kulur dehbi. Żid il-ful imqaxxar u qalli għal 2 minuti oħra.
- Neħħi t-taġen minn fuq in-nar u żid it-taħlita ta’ żejt u ħall, in-nagħniegħ, u niskata melħ u bżar mitħun frisk.
- Servi bil-ġewż imqatta’ fil-wiċċ.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
