It-traħana hija prodott li jittiekel fil-Greċja u l-Lvant tal-Mediterran, magħmul mill-qamħ bulgur, semolina, jew taħlita ta’ semolina u dqiq, miżjud il-ħalib għal traħana ħelwa, jew ħalib u jogurt għal traħana b’togħma aktar qarsa. Biex tagħmel it-traħana d-dar segwi din ir-riċetta, imbagħad kompli fuq din ir-riċetta ta’ traħana bil-faqqiegħ.
Ħin 35 minuta
Ingredjenti
Għal 6 persuni
- 28g (1 kikkra mburġata) faqqiegħ imnixxef, l-aħjar li tuża huma t-tip porcini
- 1 litru stokk tal-ħaxix jew tat-tiġieġ
- Melħ
- 2 mgħaref żejt taż-żebbuġa ekstra verġni
- ½ kikkra basal aħmar jew isfar, imqatta’ rqiq ħafna
- 680g faqqiegħ frisk, imnaddaf u mqatta’ biċċiet kbar
- 2 sinniet tewm, misħuqin
- ½-1 kuċċarina weraq tat-timu frisk, jew ¼-½ kuċċarina timu niexef
- 1½ kikkra traħana tal-bulgur mill-qarsa
- ½ kikkra nbid abjad bħal Pinot Grigio jew Sauvignon Blanc
- Bżar mitħun frisk
- ¼ kikkra tursin frisk, imqatta’
- 28g (¼ kikkra) ġobon Parmiġġan, maħkuk
- Poġġi l-faqqiegħ imnixxef f’bieqja u ferra’ fuqu 3 kikkri ilma jagħli. Ħallih joqgħod għal 30 minuta.
- Iksi passatur bix-xoqqa jew żewġ saffi karta tal-kċina, poġġih fuq bieqja u saffi l-faqqiegħ. Agħsar il-faqqiegħ mal-passatur biex tneħħilu l-ilma, imbagħad laħlaħ għal divers drabi biex tnaddfu sew. Qattgħu f’biċċiet kbar u warrbu.
- Ħallat l-ilma li xarrabt il-faqqiegħ fih mal-istokk biex ikollok b’kollox 7 kikkri. Żid il-melħ jekk l-istokk mhux mill-mielaħ. Poġġi l-likwidu f’kazzola fuq in-nar u saħħan sakemm jibda jagħli.
- Saħħan 1 mgħarfa żejt taż-żebbuġa f’taġen kbir bil-qiegħ oħxon, fuq nar medju, u żid il-basal.
- Tektek għal 5 minuti sakemm jirtab, imbagħad żid il-faqqiegħ imnixxef u l-faqqiegħ il-frisk. Sajjar għal madwar 3 minuti sakemm il-faqqiegħ jibda jerħi l-likwidu.
- Żid it-tewm, it-timu u niskata melħ. Kompli sajjar sakemm jinxtorob il-likwidu tal-faqqiegħ, imbagħad żid il-kumplament taż-żejt u t-traħana. Ħawwad sakem it-traħana tinkesa kollha biż-żejt.
- Ferra’ l-inbid fuq kollox u kompli ħawwad sakemm l-inbid jinxtorob.
- Żid kuċċarun jew tnejn stokk, biżżejjed biex tgħatti t-traħana. Il-likwidu jrid ikun qed ibaqbaq bil-mod. Ħawwad sikwit sakemm ikun kważi nxtorob kollu.
- Żid kuċċarun ieħor stokk u kompli sajjar bl-istess mod – iżżid l-istokk meta t-traħana tkun kważi xxuttat mil-likwidu – madwar 15-20 minuta. Żid melħ u bżar mitħun frisk skont il-gosti tiegħek.
- Żid l-aħħar ftit stokk mat-taħlita, kif ukoll it-tursin u l-Parmiġġan. It-taħlita tat-traħana għandha issa tkun kremuża. Servi fil-pront fi bwieqi wisgħin.
Dan il-platt tista’ tippreparah ftit sigħat qabel, imma żomm ftit stokk biex tkun tista’ żżidu int u ssaħħnu. It-traħana ma ssirx ċappa bħalma jsir ir-ross wara ċertu ħin.
