To read this in English: Maltese recipe: Kawlata
Il-kawlata hija platt tradizzjonali Malti li ftit ftit qed jinqata’ u r-riċetta tiegħu tintnesa. Din hija r-riċetta li għadha tagħmel ommi , li llum għandha 81 sena, li kompliet fuq ir-riċetta tal-kawlata li kienet tagħmel ommha, in-nanna tiegħi. Il-kawlata hija platt komplut b’ammont kbir u varjat ta’ ħaxix, fażola u majjal, u ftit għaġin. L-għaġin fir-riċetta oriġinali tal-kawlata huwa l-imqarrun, imma jien insibu goff wisq għal ma’ platt tal-ħaxix u, biex inżomm l-istess forma ta’ għaġin imma iċken fid-daqs, nuża ż-żibeġ kbar. Fażola tista’ tuża tal-bott biex tiffranka l-ħin; tista’ wkoll ixxarrab fażola niexfa matul il-lejl u tgħalliha sakemm tirtab, għal madwar siegħa jew siegħa u nofs, u ssaffiha. Jiena nħobb inxarrab u ngħalli ammont akbar ta’ fażola, imbagħad niffriżaha f’porzjonijiet biex isservini tul ix-xitwa.
Ħin: Siegħa u 45 minuta
Issevi: 6 persuni
Ingredjenti:
- 200 g fażola bajda, imsajra jew tal-bott
- 300 g xikel tal-majjal affumikat jew bacon
- 500 g żaqq tal-majjal, mingħajr ġilda
- 500 g qargħa ħamra, jew ħamra u safra
- 3 izkuk tarjin karfus ta’ Malta, imqattgħin bil-weraq b’kollox
- 300 g karrotti (3 karrotti mdaqqsin), imqaxxrin u mqattgħin dadi żgħar
- 300 g ċentinarja (chayote squash)(tnejn żgħar) imqaxxrin u mqattgħin dadi (Tista’ tuża qarabagħli)
- 500 g pastard (nofs pastarda kbira), miftuħa fjuri żgħar
- 300 g kaboċċi (nofs kaboċċa) imqattgħa
- 1 litru stokk tal-ħaxix
- 2 mgħaref kunserva
- Bżar mitħun frisk
- Kuċċarina bużbież ta’ Malta
- 100 g għaġin żibeġ mill-kbir
- 100 g ġobon kefalotiri (tal-ħakk), maħkuk
Tħejjija:
- F’borma kbira qiegħed l-ingredjenti kollha minbarra l-ġobon u l-għaġin u ħawwad kollox flimkien.
- Poġġi l-borma mgħottija fuq nar għoli. Kif tiftaħ tagħli baxxi n-nar u ħalliha ttektek magħluqa għal 45-50 minuta, filwaqt li tħawwad kull tant ħin.
- Tella’ l-laħam mill-borma, aqilgħu minn mal-għadam jew qarquċ li jista’ jkollu, qattgħu biċċiet u erġa’ itfgħu fil-borma.
- Żid l-għaġin u ħawwad. Għolli n-nar għal moderat u sajjar l-għaġin għal 8-10 minuti.
- Neħħi l-borma minn fuq in-nar, żid nofs il-ġobon u ħawwad.
- Servi b’aktar ġobon imferrex fil-wiċċ tal-kawlata.
Nota: jekk tħalli l-kawlata toqgħod għal siegħa imbagħad terġa’ ssaħħanha qabel iżżid l-għaġin biex isserviha, it-togħma toħroġ aktar bnina.
Ippruvajt din ir-riċetta? Kif sibtha? Għidilna billi tħalli kumment u r-rating hawn taħt u agħfas share.
