Riċetta Tradizzjonali Maltija: Ful bil-kusksu

Ful bil-kosksu (Ritratt minn Victoria Cassar)

Platt ieħor tipikament Malti bil-ful u l-ġbejniet friski. Tista’ wkoll iżżid bajda għal kull persuna mal-ġbejniet – kemm tofsoqhom fil-wiċċ, wara li tkun żidt l-għaġin u l-ġbejniet, u tgħattihom bil-meraq stess.

Ħin: siegħa u 10 minuti

Issevi: 4 persuni

Ingredjenti:

  • 2 basliet ħodor kbar, imqattgħin
  • 2 sinniet tewm, imqattgħin
  • 2 qarabagħliet, imqattgħin dadi
  • 2 kg imżiewet ta’ ful frisk
  • Zokk ta’ karfusa, imqatta’ rqiq
  • Mgħarfa kunserva
  • Litru stokk tal-ħaxix
  • 150 g għaġin kusksu
  • 4 ġbejniet friski
  • Mgħarfa żejt taż-żebbuġa
  • Bżar mitħun frisk
  • 4 mgħaref ġobon kefalotiri (tal-ħakk), maħkuk 

Tħejjija:

  1. Qaxxar il-ful mill-ewwel qoxra u jekk issib minnu li qabad jisfar qaxxru wkoll mit-tieni qoxra.
  2. Saħħan iż-żejt f’kazzola jew borma fuq nar moderat u qalli l-basal u t-tewm sakemm jirtabu.
  3. Żid il-kunserva, ħawwad għal ftit ħin, imbagħad żid il-qarabagħli u l-ful. Fl-aħħar żid ukoll l-istokk tal-ħaxix u l-bżar.
  4. Għatti l-borma u għolli n-nar. Kif tiftaħ tagħli baxxi n-nar u tektek sakemm il-ħaxix ikun kważi sar, għal madwar nofs siegħa.
  5. Żid il-kusksu u ħawdu.
  6. Fil-wiċċ poġġi l-ġbejniet friski u għaddashom sew fil-likwidu biex jitgħattew.
  7. Tektek  għal madwar 15-il minuta oħra.
  8. Servi l-ful bil-kusksu bil-ġobon maħkuk imferrex fil-wiċċ.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!