Riċetta tradizzjonali: Aljotta

L-aljotta hija riċetta tradizzjonali Maltija għal brodu tal-ħut. L-aljotta hija tajba u bnina iżda magħmula minn ingredjenti sempliċi ħafna. Filfatt, ġeneralment, issib li wieħed juza xi ħut jew partijiet tal-ħut li ssoltu ma tistax taqbad u tiekolhom. Jintuża ħut żgħir bħall-iskorfon (scorpion fish), il-burqax (painted comber) u l-vopi (bogue), jew inkella l-irjus u d-dnub ta' ħut akbar bħall-lampuki. Ħafna drabi npoġġu l-ħut f'xibka biex il-ġilda u l-għadam ma jintilfux fis-soppa. Xi biċċiet tal-ħut li huma tajbin għall-ikel jerġgħu jitpoġġew fis-soppa fl-aħħar, jew jisservew wara bħala platt prinċipali. L-aljotta tradizzjonalment tkun magħmula wkoll b'ħafna tewm, tadam, xi hxejjex aromatiċi u ross.

Ingredjenti:

  • 450g ħut
  • 450g tadam mqaxxar u mqatta' (biex tara kif tista' tqaxxar it-tadam ikklikja hawn
  • 2 basliet imqattgħin
  • 10 sinniet tewm maħkuk
  • Mgħarfa kunserva
  • Mgħarfa żejt taż-żebbuġa
  • Ponta merqtux (marjoram)
  • Ponta nagħniegħ (mint)
  • Bżar iswed sħiħ skont il-gosti
  • 4 kikkri stokk tal-ħut u inbid abjad (jekk trid)
  • 1/3 kikkra ross nej
  • Lumija (jekk trid)

Tħejjija:

  • Saħħan iż-żejt fuq nar medju-għoli ġo taġen kbir. Żid il-basal u sajjar sakemm il-basla tirtab.
  • Żid it-tewm, aqli għal 30 sekonda, imbgħad żid it-tadam, il-kunserva, in-nagħniegħ u l-merqtux u sajjar fuq nar baxx għal madwar 8 minuti.
  • Żid l-istokk tal-ħut u x-xibka bil-ħut u l-bżar iswed. Jekk trid tista' żżid ukoll kikkra nbid abjad jew skont il-gosti. Sajjar għal madwar 15-il minuta.
  • Itfa' r-ross u sajjar għal madwar 15-20 minuta oħra jew sakemm ir-ross ikun sar.
  • Neħħi x-xibka minn ġot-taġen, neħħi l-laħam it-tajjeb u erga' itfa' fil-borma.
  • Servi sħuna u raxxax bil-meraq tal-lumi jekk tixtieq.