Ħu dawn it-torti miegħek piknik jew servihom f’buffet. Din ir-riċetta ġiet iddisinjata sabiex tkun tista’ ġġorrhom miegħek u huma tajbin kemm sħan kif ukoll kesħin.

Ħin totali: Sagħtejn u 15-il minuta

Preparazzjoni: 35 minuta

Preparazzjoni (mhux attiva): 45 minuta

Tisjir: 55 minuta

Isservi: 6

Livell: faċli

Ingredjenti:

MILI:

Mgħarfa butir mingħajr melħ

2 kuċċarini melħ koxer

2 friegħi sagħtar (thyme) frisk

Basla żgħira, imqattgħa f’kubi ta’ ¼ ta’ pulzier (qisu daqs kikkra)

½ tuffieħa ħadra, imqaxxra u mqattgħa f’kubi ta’ ¼ ta’ pulzier (daqs nofs kikkra)

2 sinniet tewm imqatta' rqiq

450 g majjal mingħajr għadam (pork butt) imqatta’ f’kubi ta’ ¼ ta’ pulzier

115 g biċċiet bacon ħoxnin (xi sitta) imqattgħin irqiq

2 kuċċarini salvja friska, imqattgħin irqiq

¼ ta' kuċċarina qoxra tan-noċemuskata (mace) mitħuna

½ kuċċarina bżar iswed mitħun

¼ ta' kuċċarina noċemuskata mitħuna

¼ ta' kuċċarina bżar abjad mitħun.

GĦAĠINA:

4 kikkri dqiq (all-purpose)

6 mgħaref butir mingħajr melħ

6 mgħaref lardu

Kuċċarina u nofs, melħ koxer

Isfar ta’ bajda (ħabbatha ma’ kuċċarina ilma)

Mustarda Ingliża taħraq, biex isservi

Għal din ir-riċetta għandek bżonn sitt dixxijiet żgħar (ramekins) ta’ 170 g

Metodu:

Għall-mili: Saħħan il-butir f’taġen żgħir. Żid ½ kuċċarina mill-melħ, is-sagħtar, il-basal u t-tuffieħ u sajjarhom sakemm it-tuffieħ u l-basal jirtabu, xi 5 minuti. Żid it-tewm u kompli sajjar għal 2 minuti. Neħħi minn fuq in-nar, neħħi s-sagħtar u ħalli t-taħlita tibred.

Ħallat t-taħlita tal-basal u tuffieħ, il-majjal, il-bacon, is-salvja, il-bażar iswed, il-qoxra tan-noċemuskata, in-noċemuskata, il-bżar abjad  u l-melħ li fadal fi skuttella kbira. Itfa nofs it-taħlita f’ food processor u ħalltu sakemm jifforma pejst, u wara erġa' poġġih fl-iskuttella u ħalltu sew man-nofs l-ieħor tat-taħlita. Poġġi t-taħlita fil-friġġ sakemm tagħmel l-għaġina.

L-għaġina: Qiegħed id-dqiq fi skutella kbira. Saħħan il-butir, il-lardu u l-melħ b’2/3 ta’ kikkra ilma f’kazzola sakemm il-butir u l-lardu jdubu, u wara żidhom mad-dqiq. Ħallathom sakemm tifforma għaġina mingħajr biċċiet. Meta l-għaġina tkun għadha sħuna, ifforma l-qoxra tat-torta  billi tagħfas ¼ ta’ kikkra għaġina fid-dixxijiet żgħar sabiex il-qiegħ u l-ġnub ikunu itwal mill-ġnub tad-dixx. Ara li ma jkollokx toqob u li l-għaġina tkun tal-istess ħxuna, xi 1/8 ta’ pulzier. Qassam l-għaġina li fadal f’sitt biċċiet indaqs u rembilhom fi ċrieki li huma ikbar mill-wisa’ tad-dixx (dijametru ta’ xi 4 pulzieri) biex wara li timliehom, tgħatti t-torti. Agħmel toqba żgħira fin-nofs ta’ kull waħda.

Qiegħed karta tat-tisjir fuq l-ixkaffa t’isfel tal-forn. Saħħan il-forn minn qabel sa 220 °C.

Imla kull dixx b’xi ½ kikkra mili. Qiegħed ftit mill-bajd imħallat bl-ilma mal-ġnub tal-għaġina li taqbeż il-ġenb tad-dixx. Oqgħod attenta li ma jaqagħlekx bajd ma’ ġenb id-dixx. Qiegħed ftit mit-taħlita tal-bajd u ilma (permezz ta’ bruxx tal-kċina) mat-tundjatura tal-biċċiet tal-għaġina li rembilt qabel u wara, qiegħed il-lati fuq it-torti (bin-naħa li fiha t-taħlita tal-bajd tħares ’l isfel). Neħħi l-għaġina żejda bi mqass tal-kċina u agħfas il-ġnub ’l isfel b’furketta. Qiegħed ftit mit-taħlita tal-bajd u ilma fuq il-wiċċ.

Qiegħed id-dixxijiet fuq il-karta tat-tisjir fil-forn sħun. Sajjarhom fuq l-ixkaffa t’isfel għal 20 minuta, u wara, naqqas it-temperatura sa 190°C u kompli sajjar sakemm l-għaġina ssir lewn id-deheb u tintefaħ ftit, xi 25 sa 30 minuta.  

Ħalli t-torti jiksħu kompletament qabel ma tipprova toħroġhom mid-dixxijiet. Servihom b’temperatura medja.

Ippruvajtha din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.