L-għads (lentils) huwa sors ta’ proteina u ħadid, huwa wieħed mill-aktar ikel tajjeb għas-saħħa u faċli biex tiddiġerixxih. Għalhekk għal ħafna nies l-għads jieħu post il-laħam u huma parti mid-dieta ta’ kuljum tagħhom. Il-Griegi jagħmlu torta tal-għads meraviljuża.
Ingredjenti
Għal 6 persuni
- 2 mgħaref żejt taż-żebbuġa ekstra verġni
- 1 basla, imqattgħa
- 2 sinniet tewm, misħuq
- 2 kikkri għads misjur bi ¼ kikkra tal-brodu mit-tisjir, jew 2 kikkri stuffat tal-għads u t-tadam
- ½ kikkra ħxejjex aromatiċi mħallta, bħal tursin, nagħniegħ, origanu u xibt (dill)
- 140g ġobon feta, imfarrak
- 1 mgħarfa butir mingħajr melħ
- 12-il folja għaġina filo
- Saħħan 1 mgħarfa żejt taż-żebbuġa f’taġen u qalli l-basla għal 5-8 minuti.
- Żid niskata melħ u t-tewm u ħawwad għal xi minuta. Neħħi t-taġen minn fuq in-nar.
- F’bieqja mdaqqsa ħallat il-basla u t-tewm imqollija mal-għads, ħxejjex aromatiċi u ġobon feta.
- Saħħan il-forn għal temperatura ta’190°C.
- Poġġi l-kumplament taż-żejt taż-żebbuġa mal-butir f’kazzola żgħira u saħħan sakemm jinħall il-butir.
- Idlek turtiera ta’ 22ċm dijametru bil-butir u żejt.
- Ifrex il-folji tal-għaġina filo fuq il-wiċċ fejn qed taħdem u għattihom b’sarvetta. Fuq is-sarvetta niexfa ifrex oħra niedja. Ħu l-folji tal-għaġina waħda waħda u kull darba erġa’ għatti bis-srievet.
- Iksi l-qigħ tat-turtiera b’folja għaġina, daħħalha sew fl-irkejjen u ħalli ż-żejjed imdendel max-xifer tat-turtiera. Idlikha ħafif bil-butir u żejt. Dawwar kemm kemm it-turtiera u ifrex folja oħra fuq ta’ qabilha b’tali mod li t-tarf jgħatti parti oħra mix-xifer tat-turtiera.
- Ifrex ħames folji oħra, kull darba idlek bil-butir u żejt, u tarraġhom ftit biex ix-xaqliba tgħatti x-xifer kollu tat-turtiera.
- Imla t-turtiera bil-mili tal-għads, imbagħad iġbed it-truf imdendlin għal fuq il-mili, filwaqt li tidlek kull waħda bil-butir u żejt sakemm jinkesa l-wiċċ kollu.
- Ifrex il-ħames folji għaġina li jkun fadal fuq il-wiċċ, filwaqt li tidlek bil-butir u żejt u ddawwar ftit it-turtiera bejn waħda u oħra. Geddes it-truf fil-ġnub tat-turtiera u idlek il-wiċċ kompletament bil-butir u żejt. Taqqab ’l hawn u ’l hemm il-wiċċ b’ponta ta’ sikkina.
- Aħmi għal 45-50 minuta, sakemm il-wiċċ jieħu kulur dehbi. Servi sħuna jew temperatura tal-kamra. Jekk ikun hemm bżonn daħħal it-torta f’forn fietel għal 10 minuti biex l-għaġina terġa’ tiġi tqarmeċ.