Torta ħelwa b’għaġina mhux bħal tas-soltu. Il-polenta f’din l-għaġina tagħmilha bħal gallettina shortbread li mal-mili ħelu u artab ta’ ġewwa tagħmel kuntrast pjaċevoli għall-aħħar.
Ħin: siegħa u 5 minuti
Isservi: 8 porzjonijiet
Ingredjenti:
- 400g ġamm tar-rasberry
- 150g żbib, imqatta’
- 65g lewż imqaxxar, inkaljat u mfarrak
- 1 kuċċarina qxur tal-larinġ, maħkuk irqiq
- 300g dqiq self-raising
- 140g polenta
- 100g zokkor fin (caster sugar)
- 125g butir, f’temperatura tal-kamra u mqatta’
- 2 bajdiet
- ½ kuċċarina essenza tal-vanilla
- Ħalib, biex tidlek
- Zokkor tal-ġelu (icing sugar), biex troxx
- Krema mħabbta, biex isservi
Metodu:
- Saħħan il-forn għal temperatura ta’ 170°C. Ħallat flimkien il-ħamm, iz-zbib, il-lewż u l-qxur tal-larinġ b’bieqja.
- Ħallat flimkien id-dqiq, il-polenta u z-zokkor f’bieqja kbira u żid il-butir. Bil-ponot ta’ subgħajk daħħal il-butir fid-dqiq u zokkor sakemm isir qisu frak tal-ħobż.
- Ħabbat flimkien il-bajd u l-essenza tal-vanilla. Żid bat-taħlita tad-dqiq u ħawwad b’sikkina tat-tarf tond sakemm jitħallat kollox u t-taħlita tamalgama. Agħġen ftit b’idejk, imbagħad oħroġha fuq il-mejda u kompli aħdimha sakemm tillixxa. Aqsam l-għaġina f’żewġ biċċiet.
- Idlek dixx, jew landa baxxa kwadra, ta’ 22ċm bil-butir u roxx bid-dqiq. Roxx il-mejda u l-lembuba bid-dqiq u iftaħ l-għaġina bi ħxuna ta’ 5mm. Iksi l-landa bl-għaġina .
- Ferra’ u ifrex it-taħlita tal-ġamm, iftaħ it-tieni nofs tal-għaġina u iksi l-wiċċ. Ippressa t-trufijiet tal-għaġina flimkien u aqta’ barra ż-żejjed. Idlek il-wiċċ bil-ħalib. Aħmi għal 30-35 minuta jew sakemm l-għaġina tieħu kulur dehbi. Ħalliha fid-dixx għal 10 minuti biex tibred.
- Aqla’ t-torta mill-landa u roxxha biz-zokkor tal-ġelu mgħarbul u serviha bil-krema mħabbta.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
