Jekk trid ħelu differenti għal dan l-Għid ipprova din it-torta Daniża taċ-ċikkulata li tixbah xi ftit ukoll ’il-figolli tagħna l-Maltin, b’għaġina ħoxna minn taħt u minn fuq u mili tal-istess għoli fin-nofs.
Preparazzjoni: 40 minuta
Ħin totali: siegħa u 35 minuta; u ħin ta’ 4 sigħat jew lejl biex toqgħod l-għaġina, u ħin biex toqgħod u tiksaħ
Isservi: 8 persuni
Ingredjenti:
Għall-għaġina:
- 175 ml ħalib fietel
- Bajda, imħabbta
- 450 g dqiq, mgħarbul
- 2 kuċċarini ħmira mnixxfa
- 50 g zokkor fin (caster sugar)
- 250 g butir kiesaħ, imqatta’
- Niskata melħ
Għall-mili:
- 200 g lewż inkaljat ħafif u mqatta’ għat-tul (flaked)
- 50 g zokkor tal-ġelu (icing sugar)
- 25 g kawkaw
- 50 g butir, temperatura tal-kamra
- L-abjad ta’ bajda
- 50 g ċikkulata skura, imkissra biċċiet żgħar
Biex tiżbogħ il-wiċċ:
- L-isfar ta’ bajda
- 3 imgħaref ħalib
- Zokkor ismar, biex troxx
Għall-ġelu:
- 50 g zokkor tal-ġelu (icing sugar)
Tħejjija:
- Ħallat flimkien il-ħalib u l-bajda fi skutella żgħira.
- Poġġi d-dqiq u l-butir fi skutella kbira u daħħal il-butir fid-dqiq sakemm isir bħal frak tal-ħobż (rubbing in method).
- Żid il-ħmira, iz-zokkor u niskata melħ, u ħawwad kollox flimkien.
- Agħmel ħofra f’nofs it-taħlita u ferra’ l-bajda u l-ħalib fiha. Għaqqad l-ingredjenti flimkien b’idejk.
- Roxx il-mejda bid-dqiq u aqleb it-taħlita fuqha; agħġen ftit sakemm tagħqad. Iftaħ l-għaġina f’rettanglu u itwi ż-żewġt iġnub il-qosra ’l ġewwa biex jiltaqgħu fin-nofs; erġa’ itwi l-ġnub għan-nofs għat-tieni darba. Iftaħ l-għaġina f’rettanglu għal darb’oħra u rrepeti l-proċess tat-tiwi. Geżwer l-għaġina fil-cling film u ħalliha toqgħod fil-friġġ għal mill-inqas 4 sigħat jew tul il-lejl.
- Għall-mili: fi proċessur tal-ikel kisser 150 g mil-lewż maz-zokkor tal-ġelu u l-kawkaw, żid il-butir u l-abjad tal-bajd, u ħallat sakemm isiru paste. Żid iċ-ċikkulata u daħħalha fit-taħlita b’mgħarfa.
- Idlek landa tal-qiegħ jinqala’ ta’ 23 ċm bil-butir.
- Aqsam l-għaġina f’biċċtejn – waħda kemm kemm ikbar mill-oħra. Bil-parti l-kbira iksi l-qiegħ u l-ġnub tal-landa.
- Ifrex il-mili ugwalment mal-qiegħ kollu. Iftaħ il-kumplament tal-għaġina f’ċirku u poġġih fuq il-mili.
- B’sikkina aqta’ l-għaġina żejda minn mad-dawra u b’subgħajk oqros ftit it-truf flimkien.
- Għatti l-landa bil-cling film u ħalliha toqgħod f’post għas-sħana għal madwar siegħa.
- Saħħan il-forn għal temperatura ta’ 160°C.
- Ħabbat l-isfar tal-bajda mal-ħalib u bihom idlek il-wiċċ tat-torta u ferrex il-kumplament tal-lewż u ftit zokkor ismar.
- Aħmi għal 40-45 minuta sakemm it-torta tintnefaħ u tieħu kulur ħamrani. Oħroġha mill-forn u ħalliha tibred għal siegħa.
- Fi skutella żgħira ħoll iz-zokkor tal-ġelu bi ftit qtar ta’ ilma kiesaħ. Aqla’ t-torta mil-landa u poġġiha fuq platt ċatt, u b’mgħarfa ferrex il-ġelu fuq wiċċ it-torta.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
