L-għeneb, flimkien mal-lumi u l-ħxejjex aromatiċi differenti, fuq ġewwa u fuq barra tat-tiġieġa, jagħtuha togħmiet imħallta u jżommuha morbida u tarja, u jiffurmaw zalza (tixbah liċ-chutney) differenti mis-soltu.
Ingredjenti
Għal 4-5 persuni
- Tiġieġa sħiħa għall-forn (madwar 4kg)
- 1 lumija, imqattgħa fi flieli rqaq
- Melħ u bżar mitħun frisk
- 1 basla, imqaxxra u mqattgħa fi tmien flieli
- Għanqud għeneb mingħajr żerriegħa (madwar 3 kikkri), maqsum min-nofs
- Ħxejjex aromatiċi: klin, timu, salvja u stragun (taragon)
- 2 kikkri nbid abjad
- Żejt taż-żebbuġa
Metodu
- Saħħan il-forn għal temperatura ta’ 230°C. Ixxotta t-tiġieġa. Ogħrok il-ġewwieni tagħha biż-żejt taż-żebbuġa. Roxx minn barra u minn ġewwa bil-melħ u l-bżar.
- Daħħal kikkra mill-għeneb fil-vojt tat-tiġieġa. Daħħal ukoll 2 flieli basal, ftit mil-lumi u nofs il-ħwawar.
- Poġġi l-kumplament tal-basal u ftit flieli tal-lumi fil-qiegħ ta’ dixx u poġġi t-tiġieġa bis-sider ’l isfel fuqhom. Daħħal friegħi tal-ħxejjex aromatiċi u flieli tal-lumi taħt il-ġwienaħ.
- Ixwi għal 25 minuta, imbagħad ferra’ kikkra nbid fuq it-tiġieġa u baxxi t-temperatura għal 200°C. Sajjar għal 30 minuta oħra u ferra’ t-tieni kikkra nbid fuq it-tiġieġa. Kompli sajjar għal 20 minuta oħra, sakemm meta ddaħħal sikkina fil-koxxa tat-tiġieġa qrib il-ġog il-meraq joħroġ ċar (mhux roża) biex it-tiġieġa tkun saret sew minn ġewwa.
- Oħroġ id-dixx mill-forn u għattih b’biċċa foil. Ħalli t-tiġieġa toqgħod għal 15-il minuta.
- Poġġi t-tiġiega fuq board. Aqta’ mad-dawra tal-koxxa biex taqla’ s-saqajn b’kollox, imbagħad aqta’ l-ġwienaħ. Aqsam mit-tul in-nofs tas-sider u aqla’ l-laħam taż-żewġ naħat tiegħu. Qatta’ s-sider mill-wisa’ biex isservih. Irranġa l-biċċiet tat-tiġieġa fuq platt kbir u dawwarhom bil-basal u l-għeneb ta’ ġod-dixx u xarrab it-tiġieġa bil-meraq. Servi mar-ross mgħolli jew noodles tal-bajd.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
