It-tiġieġ huwa ikel versatili ħafna u tista' ssajru f'ħafna modi differenti, ma jqumx ħafna flus u tista' tiekol kull parti tiegħu. Huwa ukoll tip ta' laħam li fih inqas xaħam u b'hekk huwa aħjar għas-saħħa. Ipprova din ir-riċetta għal tiġieġ bil-'mango' għal xi ħaġa mhux tas-soltu.
Ingredjenti:
Għat-tiġieġ:
- 4 biċċiet sider tat-tiġieġ (1/2 kilo)
- 2 imgħaref ħwawar tat-tiġieġ
- 1/4 kikkra żejt tal-qamħirrun (corn oil) Lesieur
- 3 imgħaref meraq tal-lumi jew tal-lajm
Salsa bil-mango u l-bżar (Mango Pepper Salsa):
- 2 kikkri mango friska mqatta' f'kwadri ta' madwar 1/4 pulzier
- Kikkra bżar aħmar ħelu (bell peppers, mill-kbir) mqatta' f'kwadri ta' madwar 1/4 pulzier
- Basla ħamra mqatta' rqiqa, daqs 3 imgħaref
- Mgħarfa bżar tal-jalapeno maħkuk
- Mgħarfa meraq tal-lumi jew tal-lajm
- 2 imgħaref coriander frisk, mqatta' żgħir
- Melħ u bżar skont il-gosti
Tħejjija:
- Saħħan il-grill għal 180-200C
- Neħħi x-xaħam żejjed mit-tiġieġa, laħlaħ u nixxef bil-karta tal-kċina. Jekk hemm bżonn, ħabbat il-biċċiet tas-sider tat-tiġieġ biex jiġu tal-istess ħxuna, madwar nofs pulzier, b'hekk isiru kollha ndaqs.
- Poġġi t-tiġieġ ġo borża tingħalaq ta' madwar 4 litri, flimkien mal-ħwawar, iż-żejt u l-lumi. Għalaq il-borża u ħawwad biex it-tiġieġa kollha tinkesa.
- Ixwi t-tiġieġ fuq sħana għolja għal madwar 6-8 minuti, imbgħad dawwar u kompli sajjar għal 6-8 minuti sakemm ikun sar sew. Warrab.
- Ikkombina l-ingredjenti tas-salsa ġo skutella, ħawwad kollox u żid il-bżar u l-melħ skont il-gosti. (Tista' tlesti s-salsa minn 8 siegħat qabel u żżomha fil-friġġ.)
- Poġġi t-tiġieg fil-platt, poġġi s-salsa fuq u servi.
Alternattiva: Qatta' t-tiġieġ u poġġi f'tortillas imsaħħnin. Poġġi s-salsa fuq u ftit ġobon queso fresco mfarrak (jew inkella rkotta) u għalaq it-tortillas biex tagħmel wraps.
