Il-ħobż ħelu nsibuh magħmul f’diversi pajjiżi fi żmien il-Għid. Din ir-riċetta hija waħda Russa. Il-bajd miżbugħ aħmar għandu s-sinifikat tiegħu tradizzjonali b’rabta reliġjuża, imma tista’ ma tagħmlux – it-togħma tal-ħobż tibqa’ l-istess.

Preparazzjoni: sagħtejn u nofs

Ħin totali: sagħtejn u 55 minuta

Kwantità: ħobża għal madwar 6 persuni

Ingredjenti:

• 2 pakketti (2 sachets x 7 g) ħmira niexfa
• 75 g zokkor fin (caster sugar)
• 500 g dqiq plain
• ½ kuċċarina trab tal-kannella (cinnamon)
• 175 g sultana
• Qoxra ta’ lumija, maħkuka
• 4 bajdiet
• 150 ml ħalib
• 60 g butir, imdewweb
• 2 kuċċarini melħ

Għall bajd tal-kulur:

• 4 bajdiet
• Kuċċarina kulur aħmar likwidu tal-ikel

Tħejjija:

1. Fi skutella żgħira ħallat il-ħmira ma’ kuċċarina miż-żokkor u 50 ml ilma fietel. Ħalli t-taħlita toqgħod f’post sħun għal 15-il minuta sakemm tibda ttella’ r-ragħwa fil-wiċċ.
2. Fi skutella kbira għarbel id-dqiq u żid miegħu il-kumplament taz-zokkor, 2 kuċċarini melħ, it-trab tal-kannella, is-sultana u l-qoxra maħkuka tal-lumija. Ħawwad kollox flimkien u agħmel ħofra fin-nofs tat-taħlita.
3. Fi skutella oħra ħabbat 3 mill-bajd u magħhom żid il-ħalib, il-butir, 50 ml ilma u t-taħlita tal-ħmira. Ħawwad kollox flimkien.
4. Ferra’ t-taħlita likwida fuq it-taħlita x-xotta; għaqqad kollox flimkien.
5. Roxx il-mejda bid-dqiq u kompli aħdem l-għaġina fuqha sakemm issir tiġġebbed u lixxa.
6. Idlek skutella biż-żejt u poġġi l-għaġina fiha. Għatti l-iskutella bil-cling film u poġġiha f’post sħun. Ħalli l-għaġina titla’ għal madwar siegħa jew sakemm tirdoppja fid-daqs.
7. Idlek tilar bil-butir. Tella’ l-għaġina għal fuq il-mejda u bil-ponn erġa’ niżżilha fid-daqs oriġinali tagħha.
8. Aqsam l-għaġina f’żewġ biċċiet indaqs għat-tul u kompli tawwalhom sakemm jiġu madwar 40 ċm tul. Dawwar iż-żewġ biċċiet ma’ xulxin biex tifforma ħabel tal-għaġina u poġġih fuq it-tilar. Għatti b’sarvetta nadifa u poġġi t-tilar għas-sħana għal siegħa oħra sakemm l-għaġina titla’.
9. Sadanittant ipprepara l-bajd bil-kulur. Poġġi l-bajd f’kazzola u għattih bl-ilma. Żid il-kulur u ħawwad mal-ilma. Poġġi l-kazzola fuq nar għoli sakemm tiftaħ tagħli, imbagħad baxxi n-nar u tektek għal 10 minuti.  Neħħi l-kazzola minn fuq in-nar u ħalli l-bajd jibred fl-ilma stess għal 30 minuta.
10. Saħħan il-forn għal temperatura ta’ 190°C. Ħabbat il-bajda li fadal.
11. Deffes il-bajd mgħolli waħda waħda fl-għaġina tul il-ħobża u idlek kollox bil-bajda mħabbta.
12. Aħmi għal 25 minuta sakemm il-ħobża tieħu kulur ħamrani. Servi sħuna mal-butir.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!