Reġa’ wasal żmien il-Għid, żmien li nerġgħu nibdew naħsbu fl-ikel tal-okkażjoni, speċjalment il-ħelu. Kultant tajjeb li nitbiegħdu ftit minn xtutna u naraw x’ħelu joffru pajjiżi oħrajn, speċjalment dawk Mediterranji. Din hija riċetta ta’ gallettini mill-Greċja; nippruvawhom flimkien.
Preparazzjoni: siegħa u nofs
Ħin totali: siegħa u 50 minuta
Kwantità: madwar 40
Ingredjenti:
- 400 g dqiq, mgħarbul
- 200 g butir, temperatura tal-kamra
- 130 g zokkor fin (caster sugar)
- Bajda
- 40 ml ħalib
- 40 ml żejt taż-żebbuġa
- ½ kuċċarina trab tal-ħami (baking powder)
- Kuċċarina żerriegħa tal-ħlewwa (anise seed or aniseed)
- Bajda mħabbta biex tidlek
- Zokkor ismar biex troxx
Tħejjija:
- Fi skutella ħabbat flimkien b’ħabbata tal-elettriku d-dqiq, it-trab tal-ħami, il-butir, iz-zokkor fin, il-ħalib u ż-żejt sakemm jitħalltu sew biss. Żid iż-żerriegħa tal-ħlewwa u ħawwad sakemm titħallat.
- Għatti l-iskutella bil-cling film u poġġi l-għaġina fil-friġġ biex toqgħod.
- Saħħan il-forn għal temperatura ta’ 160°C. Iksi tilar bil-kartaforn.
- Bl-għaġina fforma blalen ta’ madwar 3.5 ċm. Irrombla l-blalen tal-għaġina fuq il-mejda biex b’kull ballun tifforma dudu ta’ madwar 14-il ċm tul. Ilwi kull dudu fi tnejn u remblu bħal ħabel.
- Poġġi kull biċċa lesta fuq it-tilar ippreparat, idlikhom bil-bajda u roxxhom bi ftit zokkor ismar.
- Aħmi għal 20-25 minuta jew sakemm jiħmaru.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
