Read this in English: Recipe: Lemon souffle served with white chocolate cream
Iż-żmien bejn l-aħħar tax-xitwa u l-bidu tar-rebbiegħa jġib miegħu abbundanza ta’ lumi fis-siġar tagħna. Nibdew nagħżlu ikel u ħelu aktar ħafif u b’togħmiet friski, għalhekk dan is-soufflé tal-lumi huwa ferm adattat għal dan iż-żmien.
Preparazzjoni: 25 minuta
Ħin totali: 45 minuta
Isservi: 4 persuni
Ingredjenti:
- 30 g butir
- 60 g zokkor fin (caster sugar)
- Qoxra maħkuka ta’ 1½ lumija
- 2 imgħaref dqiq, mgħarbul
- 250 ml ħalib jaħraq
- 2 bajdiet; l-isfar u l-abjad mifrudin
- 2 abjad tal-bajd
- Mgħarfa meraq tal-lumi
- Zokkor tal-ġelu, biex tgħarbel
Għall-krema taċ-ċikklata bajda:
- 125 ml krema singla
- 100 g ċikkulata bajda, imfarrka
- Qoxra maħkuka ta’ nofs lumija
Tħejjija:
- Saħħan il-forn għal temperatura ta’ 200°C. Idlek 4 kontenituri (li jesgħu 200 ml) tas-soufflé, jew kontenituri simili li jidħlu fil-forn, bi ftit żejt.
- Poġġi l-butir, iz-zokkor fin u l-qxur tal-lumi f’kazzola fuq nar medju. Ħawwad sakemm jinħall imbagħad żid id-dqiq u kompli ħawwad għal minuta oħra. Neħħi l-kazzola minn fuq in-nar.
- Ħabbat il-ħalib fit-taħlita u erġa’ poġġi l-kazzola fuq in-nar sakemm it-taħlita tibda tagħli u tibda tagħqad. Baxxi n-nar u tektek għal minuta.
- Żid l-isfra tal-bajd u l-meraq tal-lumi u ħabbat sewwa. Neħħi minn fuq in-nar u ħalli t-taħlita tibred ftit.
- Fi skutella nadifa ħabbat l-erba’ abjad tal-bajd sakemm jitilgħu xkuma. Daħħalhom bil-mod b’mgħarfa fit-taħlita tal-lumi.
- Aqsam it-taħlita bejn l-erba’ reċipjenti u aħmi għal 15-20 minuta sakemm jintefħu u jiħmaru.
- Sadanittant ipprepara l-krema taċ-ċikkulata: F’kazzola żgħira saħħan il-krema, neħħiha minn fuq in-nar u żid iċ-ċikkulata u l-qxur tal-lumi. Ħawwad sakemm tinħall iċ-ċikkulata.
- Għarbel ftit zokkor tal-ġelu u servi s-soufflé bil-krema taċ-ċikkulata bajda.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.