Il-platt tradizzjonali Irlandiż huwa l-Irish stew. Oriġinarjament kien ikun magħmul bil-laħam tal-muntun imma daż-żmien aħtar saru jużaw il-ħaruf. Hemm kontroversja jekk għandux ikun miżjud ħaxix ieħor ma’ dan l-istuffat apparti l-patata, imma l-kurrat, il-basal u l-karrotti żgur li jagħtu aktar togħma lil dan il-platt li tradizzjonalment jittiekel f’Jum San Patrizju (Saint Patrick’s day).
Preparazzjoni: 20 minuta
Ħin totali: 160 minuti
Isservi: 4 persuni
Ingredjenti:
- 2 imgħaref żejt veġetali
- 100 g dqiq
- 500 g laħam tal-muntun jew ħaruf, mingħajr għadam u mqatta’ biċċiet ta’ 5 ċm
- 1 kg patata, imqaxxra u maqsuma f’erbgħa
- 115 g basal, imqatta’
- 100 g kurrat (leeks), il-parti bajda u ħadra ċara biss, imnaddaf u mqatta’ rqiq
- 170 g karrotti, imqaxxrin u mqattgħin biċċiet kbar
- 750 ml stokk taċ-ċanga skur (beef stock)
- 3 werqiet tal-kaboċċi, imqattgħin irqiq
- Melħ u bżar mitħun frisk
Tħejjija:
- Saħħan il-forn għal temperatura ta’ 180°C.
- Poġġi d-dqiq fi skutella u dawwar il-biċċiet tal-laħam fih sakemm jinksew kompletament. Farfar iż-żejjed.
- F’taġen kbir saħħan nofs iż-żejt, żid nofs il-biċċiet tal-laħam u qallibhom sakemm jieħdu l-kulur minn kull naħa. Tella’ l-laħam mit-taġen u poġġih f’dixx fond bl-għatu (casserole). Għatti l-laħam b’nofs il-patata, basal, kurrat u karrotti.
- Saħħan in-nofs l-ieħor taż-żejt fl-istess taġen u żid il-kumplament tal-biċċiet tal-laħam. Qalleb il-laħam sakemm jieħu l-kulur minn kullimkien u poġġih fuq il-ħaxix fid-dixx. Poġġi l-aħħar nof tal-ħaxix fuq il-laħam.
- Ferra’ l-istokk fuq kollox, għatti d-dixx u daħħlu fil-forn għal siegħa.
- Żid il-weraq tal-kaboċċi u bżar u melħ (ara li l-likwidu mhux jixxotta żżejjed; jekk iva żidu ftit misħun). Daħħlu fil-forn għal siegħa oħra u jekk sa dan il-ħin ikun immerraq wisq kompli sajjar għal ftit ħin ieħor mingħajr għatu.
- Servi l-istuffat jaħraq ma’ ħobż frisk jew mal-ħobż tas-soda li huwa tradizzjonali Irlandiż ukoll.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.
